Pune police Bribe News पुणे, ता. २ : अदखलपात्र गुन्ह्यात मदत केल्याच्या कारणावरून तसेच पुढील काळात मदत करण्यासाठी ८० हजार रुपयांची लाच स्वीकारताना लोहगाव पोलीस ठाण्यातील एका पोलीस उपनिरीक्षकाला लाचलुचपत प्रतिबंधक विभागाने रंगेहात पकडले. ही कारवाई शुक्रवारी (ता. १) सायंकाळी सुमारे पावणे सातच्या सुमारास लोहगाव पोलीस ठाण्यात करण्यात आली. या घटनेमुळे पुणे शहर पोलीस दलात खळबळ उडाली आहे. Pune police Bribe News
मनोज मधुकर बरुटे (वय ३८, पद – पोलीस उपनिरीक्षक, वर्ग २, लोहगाव पोलीस स्टेशन, पुणे शहर; रा. रूम क्र. ६०१, गंगा कळस सोसायटी, कळस-धानोरी, पुणे) असे रंगेहात पकडण्यात आलेल्या अधिकाऱ्याचे नाव आहे. याप्रकरणी एका ३९ वर्षीय व्यक्तीने लाचलुचपत प्रतिबंधक विभागाकडे तक्रार दिली होती.
लाचलुचपत प्रतिबंधक विभागाने दिलेल्या माहितीनुसार, तक्रारदाराचा जमिनीचा व्यवसाय असून त्यांच्या विरोधात लोहगाव पोलीस ठाण्यात अदखलपात्र (N.C.) गुन्हा नोंदवण्यात आला होता. या प्रकरणात मदत केल्याच्या मोबदल्यात तसेच पुढेही मदत करण्यासाठी आरोपी उपनिरीक्षक बरुटे यांनी तक्रारदाराकडे ७० हजार रुपयांची लाच मागितली होती. त्यानंतर तक्रारदाराने एसीबीकडे तक्रार केली.
तक्रारीची पडताळणी करताना आरोपीने स्वतःसाठी ८० हजार रुपयांची लाच मागितल्याचे पंचांसमक्ष स्पष्ट झाले. त्यानंतर एसीबीने सापळा रचून बरुटे यांना तक्रारदाराकडून ८० हजार रुपये स्वीकारताना रंगेहात पकडले. Pune police Bribe News
दरम्यान, आरोपीला ताब्यात घेण्यात आले असून त्याच्यावर लोहगाव पोलीस ठाण्यात भ्रष्टाचार प्रतिबंधक कायदा, १९८८ अन्वये गुन्हा दाखल करण्यात आला आहे. पुढील तपास लाचलुचपत प्रतिबंधक विभागाचे पोलीस निरीक्षक अविनाश घरबुडे करत आहेत.
