पुणे, : शहरातील भांबुर्डा वनपरिक्षेत्रातील राखीव वनक्षेत्रात छुप्या पद्धतीने बांधकामाचा राडारोडा आणि अजैविक कचरा टाकणाऱ्या दोन खाजगी डंपरवर वन विभागाने धडक कारवाई केली आहे. बुधवारी (ता. 22) दुपारी चार वाजण्याच्या सुमारास ही कारवाई करण्यात आली असून, दोन्ही डंपर जप्त करण्यात आले आहेत.
वनविभागाने दिलेल्या माहितीनुसार, भांबुर्डा येथील सर्वे नंबर 97 मधील राखीव वनक्षेत्रात दोन डंपर कोणत्याही परवानगीशिवाय राडारोडा टाकत असल्याची माहिती वन विभागाला मिळाली होती. वन अधिकाऱ्यांनी तात्काळ घटनास्थळी धाव घेत डंपरला अटकाव केला. यावेळी डंपरमध्ये विटांचे तुकडे, सिमेंट, माती, दगडगोटे आणि प्लास्टिक असा अजैविक कचरा आढळून आला. चालकांकडे अधिकृत कागदपत्रांची विचारणा केली असता, त्यांच्याकडे कोणतीही परवानगी नसल्याचे स्पष्ट झाले.
वन विभागाने टाटा कंपनीचे दोन डंपर ताब्यात घेतले आहेत. ज्यामध्ये MH 43 F 0927 व MH 12 HD 2461अशा नंबरचे दोन्ही डंपर जप्त करून वनपरिक्षेत्र कार्यालयात जमा करण्यात आले आहेत. सदर कारवाई वनसंरक्षक आशिष ठाकरे, उपवनसंरक्षक मोहिते, सहाय्यक वनसंरक्षक विशाल चव्हाण यांच्या मार्गदर्शनाखाली पार पडली. यामध्ये भांबुर्डा वनपरिक्षेत्र अधिकारी मनोज बारबोले, वनपाल विशाल यादव आणि वनरक्षक कृष्णा हाक्के यांनी प्रत्यक्ष सहभाग घेतला.
वन विभागाचे जनतेला आवाहन
वनक्षेत्रात अवैध कचरा, राडारोडा किंवा अजैविक साहित्य टाकणाऱ्यांविरुद्ध विभागाने विशेष मोहीम हाती घेतली असून गस्त वाढवण्यात आली आहे. वन विभागाने नागरिकांना आवाहन केले आहे की वनक्षेत्रात आग लागणे, वन्यजीवांना इजा होणे किंवा अवैध कामे होत असल्यास तात्काळ माहिती द्यावी. तक्रारीसाठी किंवा माहिती देण्यासाठी 1926 या हेल्पलाईन क्रमांकावर संपर्क साधावा. जंगलाचे संरक्षण करणे ही प्रत्येकाची जबाबदारी असून अशा गुन्हेगारांवर यापुढेही कडक कारवाई केली जाईल, असा इशारा वन विभागाने दिला आहे.
