अक्षय टेमगिरे
शिक्रापूर, (पुणे) : तळेगाव ढमढेरे येथे हनुमान यात्रेच्या निमित्ताने लावण्यात आलेल्या शुभेच्छांच्या फ्लेक्सवरून दोन गटांमध्ये जोरदार राडा झाला आहे. किरकोळ कारणावरून सुरू झालेल्या या वादाचे पर्यवसान हाणामारीत झाल्याने शिक्रापूर पोलीस ठाण्यात तिघांविरुद्ध गुन्हा दाखल करण्यात आला आहे. या घटनेमुळे यात्रा उत्सवाच्या काळात गावात काही काळ तणावाचे वातावरण निर्माण झाले होते.
हनुमान जन्मोत्सव यात्रेनिमित्त भाविकांच्या स्वागतासाठी गावात ठिकठिकाणी फ्लेक्स लावण्याचे काम कामगारांमार्फत सुरू होते. यावेळी चुकून सुनील जगताप यांच्या फ्लेक्सवर विजय घुले यांचा फ्लेक्स लावण्यात आला. ही बाब जगताप गटाच्या निदर्शनास येताच वादाची ठिणगी पडली. केवळ फ्लेक्सवर फ्लेक्स आल्याच्या कारणावरून दोन्ही गटांत शाब्दिक चकमक उडाली आणि थोड्याच वेळात त्याचे रूपांतर हाणामारीत झाले.
मिळालेल्या माहितीनुसार, या वादातून सुनील रवींद्र जगताप, अविनाश शंकर जगताप आणि रवींद्र बापू जगताप यांनी विजय घुले यांना अर्वाच्य भाषेत शिवीगाळ करत दमदाटी केली आणि बेदम मारहाण केली. भरचौकात झालेल्या या प्रकारामुळे परिसरात घबराट पसरली होती. या मारहाणीनंतर विजय घुले यांनी शिक्रापूर पोलीस ठाण्यात धाव घेऊन तक्रार दिली.
दरम्यान, पोलिसांनी फिर्यादीवरून संबंधित तिन्ही आरोपींविरुद्ध गुन्हा दाखल केला आहे. शिक्रापूर पोलीस स्टेशनचे पोलीस निरीक्षक दीपरतन गायकवाड यांच्या मार्गदर्शनाखाली पोलीस हवालदार अमोल चव्हाण या प्रकरणाचा अधिक तपास करत आहेत. धार्मिक कार्यक्रमाच्या पार्श्वभूमीवर घडलेल्या या घटनेमुळे काही काळ गावात तणावाचे वातावरण निर्माण झाले होते.
