Pune News : खडकवासला, (पुणे) : पुणे-पानशेत रस्त्यावरील कुरण बुद्रुक गावच्या हद्दीत अचानक चारचाकी गाडीचा टायर फुटल्याने चारचाकी थेट खडकवासला धरणाच्या पाण्यात कोसळल्याची घटना घडली आहे. या घटनेत १२ वर्षीय मुलीचा मृत्यू झाल्याची घटना बुधवारी (ता. ३०) संध्याकाळी सात वाजण्याच्या सुमारास घडली आहे.
१२ वर्षीय मुलीचा मृत्यू झाल्याची घटना
या अपघातात संस्कृती प्रदीप पवार (वय – १२, रा. नांदेड सिटी, सिंहगड रोड, पुणे) अपघातात मृत्यू झालेल्या मुलीचे नाव आहे. मुळशी व सिंहगड आपत्ती व्यवस्थापन समिती, पीएमआरडीए अग्निशमन दल व स्थानिक नागरिकांनी रात्री उशिरा तिचा मृतदेह पाण्याबाहेर काढला. याबाबत वेल्हे पोलीस ठाण्यात अकस्मात मृत्यूची नोंद करण्यात आली आहे.
पोलिसांनी दिलेल्या माहितीनुसार, नांदेड सिटी येथे राहणारे प्रदीप पवार हे सायंकाळी सात वाजण्याच्या सुमारास रक्षाबंधनासाठी कुटुंबीयासोबत कारने पानशेत या आपल्या मुळ गावी निघाले होते. कुरण बुद्रुक गावच्या हद्दीत माऊलाई मंदिराजवळ अचानक पवार यांच्या कारचे उजव्या बाजूचे टायर फुटल्याने त्यांचे कारवरील नियंत्रण सुटले. भरधाव वेगात असलेली कार थेट खडकवासला धरणाच्या पाण्यात कोसळली.
अपघाताचा आवाज ऐकून आजूबाजूला असलेले स्थानिक मदतीसाठी धावले. प्रदीप पवार, अर्चना पवार, प्रद्युम्न पवार व सुनीता शिंदे यांना वाचविण्यात यश आले मात्र संस्कृती गाडीतच अडकून राहिली होती. शर्थीचे प्रयत्न करत रात्री उशिरा खोल पाण्यात बुडालेली कार शोधून बाहेर काढली. कारमध्ये संस्कृतीचा मृतदेह आढळून आला.
दरम्यान, पुणे-पानशेत रस्त्यावर धोकादायक वळणे व सुरक्षेबाबत उपाययोजना नसल्याने अपघात झाल्यानंतर वाहने खडकवासला धरणाच्या पाण्यात कोसळून आठ ते दहा नागरिकांचा मृत्यू झालेला आहे. असे असताना प्रशासनाने अद्यापपर्यंत याबाबत गांभीर्याने दखल घेतलेली नाही.
