पुणे : दुचाकी व ऑईलच्या टॅंकर यांच्यात झालेल्या अपघातात दुचाकीवरील जुळ्या मुलींचा जागेवरच मृत्यू झाल्याची घटना घडली आहे. विश्रांतवाडी चौकात मंगळवारी (ता. १६) सायंकाळी सहा वाजण्याच्या सुमारास हि घटना घडली आहे. तर या अपघातात त्यांची आई जखमी झाल्याची घटना घडली आहे.
साक्षी आणि श्रध्दा झा (वय साडेतीन वर्षे , रा. भोसरी) अशी मृत मुलींची नावे आहेत. तर त्यांची आई किरण झा (वय – ३८) अपघातात जखमी झाली आहे. याप्रकरणी विश्रांतवाडी पोलीस ठाण्यात टॅंकर चालकाविरुध्द गुन्हा दाखल करण्यात आला आहे.
पोलिसांनी दिलेल्या माहितीनुसार, किरण झा दोन्ही मुलींला घेऊन उपचारासाठी येरवड्यात आल्या होत्या. तेथून त्या भोसरी येथे ऍक्‍टीवावारुन चालल्या होत्या. सिग्नल सुटल्यावर शेजारील ऑईलच्या टॅंकरचा त्यांच्या गाडीला धक्का लागला. यामध्ये तीघीही गाडीवरुन खाली पडल्या. दोन्ही मुली टॅंकरखाली सापडल्याने त्यांना जागीच मृत्यू झाला.
दरम्यान, याप्रकरणी टॅंकरचालक याच्यावर विश्रांतवाडी पोलीस ठाण्यात गुन्हा दाखल केला आहे. तर किरण झा जखमी झाल्या असून त्यांच्यावर उपचार सुरु आहेत.
