पुणे : पुणे शहर पोलिसांच्या गुन्हे शाखा युनिट 2 च्या पथकाने वानवडी परिसरात एका तडीपार गुंडाला बेड्या ठोकल्या आहेत. प्रथमेश चंद्रकांत रासगे (वय-23, रा. सोलापूर बाजार, कॅम्प) असे अटक करण्यात आलेल्या आरोपीचे नाव असून, त्याच्यावर वानवडी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, 21 एप्रिल 2026 रोजी गुन्हे शाखा युनिट 2 चे पथक हद्दीत पेट्रोलिंग करत होते. यावेळी पोलीस हवालदार ओंकार कुंभार यांना गुप्त बातमीदाराकडून खात्रीशीर माहिती मिळाली की, लष्कर पोलीस ठाण्याच्या अभिलेखावरील तडीपार आरोपी प्रथमेश रासगे हा फातिमा नगर येथील ‘तंदूर हॉटेल’ परिसरात थांबलेला आहे.
मिळालेल्या माहितीची खात्री पटल्यानंतर पोलिसांनी तातडीने तंदूर हॉटेल परिसरात सापळा रचला. यावेळी प्रथमेश रासगे तेथे दिसून येताच पथकाने त्याला शिताफीने ताब्यात घेतले. त्याची अधिक चौकशी केली असता, तो तडीपारीच्या आदेशाचे उल्लंघन करून शहरात वावरत असल्याचे स्पष्ट झाले.
आरोपी प्रथमेश रासगे याच्यावर लष्कर पोलीस ठाण्यात शरीराविरुद्धचे एकूण 3 गंभीर गुन्हे दाखल आहेत. त्याच्या वाढत्या गुन्हेगारी कारवायांमुळे पोलीस उपायुक्त झोन-2 यांनी त्याला 2 वर्षांसाठी पुणे शहरातून तडीपार केले होते. मात्र, आदेशाचे उल्लंघन केल्यामुळे त्याच्यावर आता वानवडी पोलीस ठाण्यात महाराष्ट्र पोलीस कायदा कलम 142 अन्वये गुन्हा नोंदवण्यात आला आहे.
ही कामगिरी सहाय्यक पोलीस आयुक्त (गुन्हे-1) शैलेश संखे यांच्या मार्गदर्शनाखाली प्रभारी पोलीस निरीक्षक अश्विनी जगताप, साधना ताम्हाणे, विशाल दळवी, शंकर नेवसे, ओंकार कुंभार, संजय आबनावे आणि ऋषीकेश व्यवहारे यांच्या पथकाने केली.
