Pune News पुणे, ता. 30 : सकाळच्या शांत वातावरणात भीषण अपघाताने धक्का बसला. भरधाव वेगातील ट्रॅव्हल्स चालकाचे नियंत्रण सुटल्याने बस थेट फुटपाथवर चढली. हा अपघात गुरुवारी (ता ३०) सकाळी साडेसहा वाजण्याच्या सुमारास शहरातील मध्यवर्ती अभिनव चौकात घडला. या अपघातात दुचाकीवरील दोन महिला गंभीर जखमी झाल्या असून त्यांच्यावर खासगी रुग्णालयात उपचार सुरू आहेत. सुदैवाने दोघींची प्रकृती सध्या स्थिर असल्याची माहिती मिळाली आहे. Pune News
या प्रकरणी ट्रॅव्हल्स चालक किरण रामभाऊ कचरे (वय ४२) याला पोलिसांनी ताब्यात घेतले आहे. पोलिसांच्या माहितीनुसार, संबंधित चालक स्वारगेटकडून अभिनव चौक मार्गे जात असताना अचानक वाहनावरील नियंत्रण सुटले. भरधाव ट्रॅव्हल्सने पाठीमागून दुचाकीला जोरदार धडक दिली. या धडकेत दुचाकीवरील दोन महिला खाली कोसळून गंभीर जखमी झाल्या. त्यांच्या डोक्याला आणि पायाला मार लागल्याचे समोर आले आहे. Pune News
अपघाताचा मोठा आवाज ऐकून परिसरातील नागरिकांनी तात्काळ घटनास्थळी धाव घेतली. सकाळी व्यायामासाठी बाहेर पडलेल्या नागरिकांनीही मदतीसाठी पुढाकार घेत जखमींना तातडीने रुग्णालयात हलवले. खडक पोलीस घटनास्थळी दाखल होऊन पुढील कारवाई सुरू केली. या अपघातात अत्रे सभागृहाजवळील फुटपाथवरील लोखंडी रेलिंगचेही मोठे नुकसान झाले आहे. या घटनेमुळे परिसरात काही काळ तणावाचे वातावरण निर्माण झाले होते. Pune News
