Pune News : पुणे : दर्शना पवार हत्याकांडाने पुणे हादरले, त्यानंतर काही दिवसांत भर दिवसा पुण्याच्या मध्यवर्ती सदाशिव पेठेत एका तरुणीवर कोयता हल्ला झाला. त्यानंतर पुण्यातील गुन्हेगारी वाढत चालल्याचे अधोरेखित झाले. गुन्हेगारी रोखण्यासाठी पोलिसांकडून उपाययोजना केल्या जात असतानाच एक धक्कादायक घटना शहरात घडली आहे. चक्क पोलिसांनाच मारहाण झाल्याचा प्रकार उघडकीस आला आहे.
सिंहगड रस्त्यावर घडली घटना
पुणे शहरातील गुन्हेगारी प्रवृत्ती दिवसेंदिवस वाढत असल्याने गुन्हेगारांवर कारवाई करण्यासाठी पोलिसांकडून उपाययोजना केल्या जात आहेत. पोलिसांनी मागील पंधरा दिवसांत दोन ते तीन वेळा कोम्बिंग ऑपरेशन राबवले. त्यानंतर अनेक गुन्हेगारांवर कारवाई झाली. काही जणांवर मकोका लावण्यात आला. (Pune News) कोयता गँगच्या मुसक्या आवळण्यासाठी कठोर कारवाई झाली. आयुक्त रितेश कुमार यांनी पोलिसांचे निलंबन केले. त्यानंतर गुन्हेगारी आटोक्यात येत नसल्याचे चित्र आहे. आता तर चक्क पोलिसांना मारहाण झाल्याचा प्रकार घडला आहे.
पुण्यातील सिंहगड रस्त्यावर ही घटना घडली. तोडफोड करत पोलिसांना मारहाण करण्यात आली. सिंहगड रस्त्यावरील कोल्हेवाडी येथे सराईत गुन्हेगार वैभव ईक्कर आणि त्याच्या साथीदाराने इंद्रप्रस्थ हॉटेलची तोडफोड केली. कर्मचाऱ्यांसोबत हुज्जत घालत बाटल्या फोडल्या. हॉटेलमधील कर्मचाऱ्यांना मारहाण केली. (Pune News) त्यानंतर हॉटेलमधील पैशांची लूट केली. वैभव ईक्कर आणि त्याचे साथीदार एवढ्यावरच थांबले नाही. त्यांनी हवेली पोलीस ठाण्याच्या सहाय्यक पोलीस निरीक्षक नितीन नम यांनाही मारहाण केली. पोलिसांनाच मारहाण होत असेल तर सामान्य नागरिकांचे काय, असा प्रश्न यानिमित्ताने उपस्थित होत आहे.
दरम्यान, पोलिसांनाच मारहाण झाल्याची घटना यापूर्वीदेखील घडली होती. कात्रज पोलीस चौकीत दोन महिलांनी ठाणे अंमलदार पोलीस हवालदार जाधव यांनी मारहाण केली होती. ‘आम्ही कोण आहे ते तुला दाखवितो, तुझी वर्दी उतरवितो, अशी धमकी देखील दिली होती. (Pune News) त्यानंतर पुन्हा एकदा पोलिसांनाच मारहाण झाल्याचा प्रकार उघडकीस आल्याने सामान्यांच्या सुरक्षेचा प्रश्न ऐरणीवर आला आहे.
अधिक बातम्या वाचण्यासाठी येथे क्लिक करा :
Pune News : आर.एस.एस.चे माजी प्रभारी मदनदास देवी यांचे निधन; पंतप्रधान मोदी यांच्याकडून शोक व्यक्त!
Pune News : पुणे-मुंबई द्रुतगती मार्गावर दुपारी दोन तासांचा ब्लॉक; वाहतुकीत होणार हे बदल!
