विशाल शिंदे
Pune News : नसरापूर, (पुणे) : राजगड तालुक्यातील तोरणा खोऱ्यातील धानेप येथे शुक्रवारी (ता. 24) दुपारी भीषण आग लागल्याची घटना घडली. या आगीत डोईफोडे कुटुंबातील चार सख्ख्या भावांची घरे पूर्णपणे जळून खाक झाली असून, सोन्या-चांदीच्या दागिन्यांसह लाखो रुपयांची रोख रक्कम आगीच्या भक्ष्यस्थानी पडली आहे. डोंगराळ भाग आणि पाण्याची कमतरता असल्याने आग विझवणे अशक्य झाले, ज्यामुळे सुमारे 80 लाख रुपयांहून अधिक नुकसान झाले आहे. Pune News
धानेप येथील धनगरवस्तीवर शुक्रवारी दुपारी दोन वाजण्याच्या सुमारास ही आग लागली. विठ्ठल, शिवाजी, सुरेश आणि लक्ष्मण महादू डोईफोडे या चार भावांची घरे जवळजवळ होती. घरातील वीज मीटरमध्ये शॉर्टसर्किट झाल्याने आगीचा भडका उडाला. वाळलेले गवत आणि लाकडी साहित्यामुळे आगीने रौद्र रूप धारण केले आणि काही मिनिटांतच चारही घरे भस्मसात झाली. Pune News
आग लागली तेव्हा घरातील इतर सदस्य पाणी आणण्यासाठी बाहेर गेले होते, फक्त विठ्ठल डोईफोडे यांची आई घरात होती. आगीची चाहूल लागताच प्रसंगावधान राखून त्या घराबाहेर पडल्यामुळे मोठा अनर्थ टळला. मात्र, घराबाहेर पडताना काहीही सोबत घेता न आल्याने डोईफोडे कुटुंबाचा संपूर्ण संसार डोळ्यांदेखत जळाला. Pune News
या आगीत कुटुंबाचे अतोनात नुकसान झाले आहे यामध्ये दागिने व रोख रक्कम सुमारे 28 तोळे सोने आणि 28 लाख रुपयांची रोख रक्कम जळून खाक झाली. तसेच घरातील अन्नधान्य, कपडे, भांडी आणि शेतीसाठीचे साहित्य पूर्णपणे नष्ट झाले. घराच्या परिसरातील 30 ते 40 कोंबड्या आगीत भाजून मृत्युमुखी पडल्या. दरम्यान, विठ्ठल डोईफोडे यांच्या अंदाजानुसार एकूण नुकसान 80 लाख रुपयांच्या घरात आहे. Pune News
दरम्यान, घटनेची माहिती मिळताच पोलीस पाटील अश्विनी मळेकर आणि सरपंच राहुल मळेकर यांनी तातडीने महसूल विभागाला कळवले. गाव दुर्गम भागात असल्याने तलाठी आत्माराम हापसे यांनी दोन किलोमीटरची पायपीट करून घटनास्थळ गाठले आणि नुकसानीचा पंचनामा केला. राजगडचे तहसीलदार निवास ढाणे यांनी घटनेची चौकशी करून पीडित कुटुंबाला शासनस्तरावरून मदत मिळवून देण्याचे आश्वासन दिले आहे. Pune News
