Loni Kalbhor लोणी काळभोर, ता. 25 : लोणी काळभोर पोलीस ठाण्याच्या हद्दीत अवैध धंदे पुन्हा डोके वर काढत असल्याच्या चर्चांनी आता गंभीर वळण घेतले आहे. विशेष म्हणजे, या धंद्यांना स्थानिक पातळीवर ‘मोटू-पतलू’ म्हणून ओळखल्या जाणाऱ्या कथित धंदेचालकांचे संरक्षण आणि वसुलीचे जाळे असल्याची चर्चा रंगू लागल्याने पोलिसांच्या भूमिकेवरच प्रश्नचिन्ह निर्माण झाले आहे. Loni Kalbhor
पोलिसांकडून अधूनमधून कारवाया केल्या जात असल्याचा दावा केला जातो; मात्र वास्तवात दारू, मटका आणि इतर अवैध व्यवसाय उघडपणे सुरू असल्याचा आरोप नागरिक करत आहेत. “कारवाई फक्त दिखावा आहे; प्रत्यक्षात धंदे पूर्वीप्रमाणेच सुरू आहेत,” असा संतप्त सूर परिसरातून उमटत आहे. त्यामुळे पोलिसांची कारवाई ही केवळ कागदोपत्रीच आहे का? असा सवालही उपस्थित होत आहे. Loni Kalbhor
एमआयटी कॉर्नर परिसरात अंमली पदार्थ व मद्यविक्री सुरू असल्याचे सांगितले जाते. लोणी स्टेशन भागात मटका आणि हातभट्टी दारू, तर इंदिरानगर व घोरपडेवस्तीमध्ये हातभट्टीचा सुळसुळाट असल्याचा आरोप आहे. कवडी माळवाडी परिसरातही अशीच परिस्थिती असून, टोलनाक्याजवळील काही वाईन शॉपमधून रात्री उशिरापर्यंत दारू विक्री होत असल्याची चर्चा आहे. Loni Kalbhor
याशिवाय गावात मटका, पोलीस ठाण्याच्या मागील भागात हातभट्टी दारू, तर माळी मळा परिसरातील झुडपांमध्ये आणि थेऊर फाटा येथील रेल्वे लाईनजवळ पत्त्यांचे क्लब सुरू असल्याचे स्थानिकांचे म्हणणे आहे. काही टपऱ्यांमधून तंबाखू, गुटखा आणि इतर नशेच्या पदार्थांची विक्री सुरू असल्याने परिस्थिती अधिकच चिंताजनक बनली आहे. Loni Kalbhor
दरम्यान, या सर्व पार्श्वभूमीवर “अवैध धंद्यांना नेमके पाठबळ कोण देत आहे?” हा प्रश्न आता थेट पोलिसांवरच येऊन ठेपला आहे. संबंधित चर्चांबाबत अधिकृत पुष्टी नसली, तरी स्थानिकांमध्ये असंतोष वाढत असून, सखोल चौकशीची मागणी जोर धरत आहे. Loni Kalbhor
“मोटू-पतलू”वर कारवाई कधी?
अवैध धंद्यांमागे ‘मोटू’ आणि ‘पतलू’ या नावांची चर्चा जोरात असताना, त्यांच्यावर कारवाई कधी होणार? हा प्रश्न आता थेट पोलीस प्रशासनालाच विचारला जात आहे. लोणी काळभोर आणि परिसरातील नागरिकांकडून “केवळ कारवाईचे दिखावे नकोत, ठोस पावले उचला,” अशी मागणी होत आहे. अवैध धंद्यांबाबत निर्माण झालेल्या संशयाच्या पार्श्वभूमीवर “मोटू-पतलू”वर कारवाई कधी? याकडे आता संपूर्ण जिल्ह्याचे लक्ष लागले आहे.
पोलिसांच्या कार्यक्षमतेवर प्रश्नचिन्ह
लोणी काळभोर पोलिसांकडून कारवाया होत असल्याचा दावा केला जात आहे. पण प्रत्यक्षात धंदे सुरूच आहेत. दारू, मटका, हातभट्टी, गुटखा विक्रीवर नियंत्रण नाही. अवैध धंद्यांवर प्रभावी आळा बसवण्यात अपयश आल्याने पोलिसांच्या कामगिरीवर प्रश्नचिन्ह निर्माण झाले असून, ठोस व पारदर्शक कारवाईची गरज अधोरेखित होत आहे.
