Pune News : पुणे : दहीहंडी फुटल्यानंतर आपापल्या दिशेने मार्गस्थ होत असताना धक्काबुक्की झाल्यानं दोन गटात तुंबळ हाणामारी झाल्याची घटना आप्पा बळवंत चौकात घडली आहे. तब्बल वीस ते पंचवीस मिनिटं दोन गटांमध्ये झटापट आणि हाणामारी सुरू होती. पोलिसांनी मध्यस्थी करत दोन्ही गटाला हाणामारी पासून रोखलं आणि जमलेल्या जमावाला पांगवून दिलं.
पुण्यातील यंदाच्या उत्सवाला गालबोट
पोलिसांनी दिलेल्या माहितीनुसार, पुण्यात ढोल ताशा पथकांच्या वादकांमध्ये आणि मंडळाच्या कार्यकर्त्यांमध्ये हाणामारीचा थरार रंगला होता. पहिल्यांदा ढोल ताशा पथकाच्या वादकांनी मंडळाच्या एका कार्यकर्त्याला बेदम मारलं. मात्र तिथे उपस्थित असलेल्या काही पोलिसांनी मध्यस्थी करत त्या कार्यकर्त्याला तिथून बाजूला काढलं. त्याच दरम्यान त्या कार्यकर्त्यांनी मंडळातल्या काही सदस्यांना त्या ठिकाणी बोलवत वादकांवर पलटवार केला.
पोलिसांचं संख्याबळ कमी असल्यामुळे पोलिसांना कार्यकर्त्यांना आवर घालणं कठीण जात होतं. त्यावेळी मंडळाचे कार्यकर्त्यांनी वादकांवर बरसत होते. त्या ठिकाणी बघ्यांची गर्दी खूप जमली होती आणि मोठा गोंधळ आप्पा बळवंत चौक परिसरात घडला होता.
दरम्यान, काही वेळानंतर पोलिसांचा मोठा फौज फाटा आल्यानंतर पोलिसांनी गोंधळलेल्या परिस्थितीवर नियंत्रण आणलं आणि जमलेली बघायची गर्दी पांगवली. या वादामुळं दहीहंडीच्या पुण्यातील यंदाच्या उत्सवाला गालबोट लागले आहे.
