Pune Drug News कोंढवा, ता. 2 : पुणे शहरात अंमली पदार्थांविरोधात सुरू असलेल्या मोहिमेला मोठे यश मिळाले असून कोंढवा परिसरात गांजाच्या अवैध विक्रीवर पोलिसांनी मोठा घाव घातला आहे. तब्बल २२ किलो गांजासह महिला व युवकाला अटक करण्यात आली असून सुमारे ९.७५ लाख रुपयांचा मुद्देमाल जप्त करण्यात आला आहे. या कारवाईमुळे ड्रग्ज नेटवर्कला मोठा धक्का बसल्याचे मानले जात आहे. Pune Drug News
पोलीस आयुक्तांच्या निर्देशानुसार अंमली पदार्थांविरोधात कठोर कारवाई सुरू असताना परिमंडळ ०५ च्या पोलीस उप आयुक्त राजलक्ष्मी शिवणकर यांच्या मार्गदर्शनाखाली विशेष पथकाने ही धडक कारवाई केली. २९ एप्रिल रोजी पेट्रोलिंगदरम्यान पोलीस उपनिरीक्षक अल्फाज शेख यांना मिळालेल्या गुप्त माहितीवरून ही कारवाई उभी राहिली. Pune Drug News
पोलिसांनी दिलेल्या माहितीनुसार, कोंढवा खुर्द येथील शिवनेरीनगर परिसरातील गल्ली क्रमांक ३० मध्ये गांजाची मोठ्या प्रमाणात विक्री सुरू असल्याची माहिती मिळाली होती. त्यानुसार परिमंडळ ०५ पथक आणि कोंढवा पोलीस ठाण्याच्या संयुक्त पथकाने नियोजनपूर्वक छापा टाकला. Pune Drug News
छाप्यात यास्मीन करीम शेख (वय ४५) आणि आमिर समीर शेख (वय १९) या दोघांना ताब्यात घेण्यात आले. त्यांच्या ताब्यातून २१.१९८ किलो गांजा (बिया-बोंड्यासह), रोख रक्कम, मोबाईल फोन व इतर साहित्य असा एकूण ९,७४,९६० रुपयांचा मुद्देमाल जप्त करण्यात आला. या प्रकरणी कोंढवा पोलीस ठाण्यात गुन्हा रजिस्टर क्रमांक ३२८/२०२६ नुसार एनडीपीएस कायद्याच्या कलम ८(क), २०(ब)(ii)(क) व २९ अंतर्गत गुन्हा दाखल करण्यात आला आहे. पुढील तपास पोलीस निरीक्षक जगताप करत आहेत.
ड्रग्जविरोधात पोलिसांची आक्रमक मोहीम
पुणे शहरात वाढत्या अंमली पदार्थांच्या विक्रीवर आळा घालण्यासाठी पोलिसांनी आक्रमक भूमिका घेतली आहे. सततच्या छापेमारी व कारवायांमुळे ड्रग्ज नेटवर्कवर दबाव वाढत असून अशा कारवायांमुळे अवैध धंद्यांना आळा बसण्याची अपेक्षा व्यक्त केली जात आहे. या कारवाईमुळे कोंढवा परिसरात खळबळ उडाली असून नागरिकांकडून पोलिसांच्या कारवाईचे स्वागत करण्यात येत आहे.
ही कारवाई पोलीस आयुक्त अमितेश कुमार, सह पोलीस आयुक्त रंजन शर्मा, अपर पोलीस आयुक्त मनोज पाटील, पोलीस उप आयुक्त राजलक्ष्मी शिवणकर यांच्या मार्गदर्शनाखाली वरिष्ठ पोलीस निरीक्षक कुमार घाडगे, पोलीस उप निरीक्षक अल्फाज शेख, रविंद्र गावडे, पोलीस अंमलदार प्रविण उत्तेकर, सर्फराज देशमुख, कैलास सपकाळ, हणमंत कांबळे, पुजा चोरमले, विशाल मेमाणे, अमोल हिरवे, स्वागत पळसे, अमित सुर्यवंशी, पुजा नागरगोजे, शंकर माटे, आर्या सांळुके, सिध्देश झेंडे, दत्तात्रय धुमाळ यांच्या पथकाने केली आहे.
