(Pune Crime) पुणे : तरुणीने लग्न झाल्यानंतर प्रेमसंबंध ठेवण्यास नकार दिल्याच्या रागातून प्रियकराने प्रेयसी व तिच्या पतीला अ‍ॅसिड टाकून मारण्याची धमकी दिल्याचा धक्कादायक प्रकार समोर आला आहे. तसेच तरुणाने प्रेयसीच्या घरात जाऊन शिवीगाळ करत मारहाणही केली आहे. ही घटना मार्च 2021 ते गुन्हा दाखल होईपर्यंतच्या कालावधीत पुण्यातील (Pune Crime) इंदीरानगर खड्डा गुलटेकडी परिसरात घडली आहे.
पुण्यातील इंदीरानगर खड्डा गुलटेकडी परिसरातील घटना…
याप्रकरणी 26 वर्षीय तरुणीने स्वारगेट पोलीस ठाण्यात तक्रार दाखल केली आहे. तरुणीच्या तक्रारीवरून पोलीसांनी 32 वर्षीय आरोपीच्या विरुद्ध विनयभंग, मारहाण व जीवे मारण्याची धमकी दिल्याबाबत गुन्हा दाखल केला असून त्यास पोलीसांनी अटक केली आहे. अन्वर मकबूल पठाण (वय ३२, रा. इंदिरानगर, गुलटेकडी) असे अटक करण्यात आलेल्या आरोपीचे नाव आहे.
याबाबत अधिक माहिती अशी की, तक्रारदार तरुणी आणि आरोपीमध्ये लग्नापुर्वी प्रेमसंबंध होते. तरुणीने विवाह केल्यानंतर आरोपी पठाण तिला प्रेमसंबंध ठेवण्यासाठी दबाव आणत होता. दरम्यान लग्नानंतर देखील आरोपी तरुणीला त्याच्यासोबत प्रेमसंबंध ठेवण्यास सांगून शरीरसंबंधाची मागणी करत होता. मात्र, त्याला तरुणीने नकार दिला.
तरी देखील आरोपी तिच्या इच्छेविरुद्ध तरुणीचा पाठलाग करून शरीर संबंध न ठेवल्यास तिला व तिच्या पतीला अ‍ॅसिड टाकून जीवे ठार मारण्याची धमकी दिली. तसेच, फिर्यादी तरुणी घरात एकटीच असताना आरोपी घरात शिरला, त्याने तिला शिवीगाळ करून हाताने मारहाण केली. हा प्रकार घडल्यानंतर तरुणीने पोलिसात धाव घेत तक्रार दिली. पुढील तपास पोलीस करत आहेत.
