Pune Crime News | पुणे : ग्रामसेवकाचे सिनेस्टाईल अपहरण करत बंद असलेल्या हॉटेलमध्ये हातपाय बांधून ठेवले. विषारी औषध पाजण्याची धमकी देत गुगल पे ने ७३ हजार रुपयांची खंडणी उकळली. तसेच मोबाईल आणि कार बळजबरीने ताब्यात घेत आणखी दीड लाखांची मागणी केल्याची धक्कादायक घटना कुडजे (हवेली) गावच्या हद्दीत घडली आहे. एखाद्या सिनेमात घडवा असा प्रसंग घडल्याने परिसरात खळबळ उडाली आहे.
ग्रामसेवक महेशकुमार खाडे असे ग्रामसेवकाचे नाव आहे. त्यांनी दिलेल्या तक्रारीनुसार उत्तम नगर पोलीस ठाण्यात गुन्हा दाखल करण्यात आला आहे. याप्रकरणी विकास प्रकाश गायकवाड (वय ३८, रा. कुडजे, ता. हवेली जि. पुणे) व त्याच्या इतर दोन अज्ञात साथीदारांच्या विरोधात गुन्हा दाखल करण्यात आला असून तीन आरोपींपैकी पोलिसांनी दोघांना अटक केली आहे.
पोलिसांनी दिलेल्या माहितीनुसार, कुडजे गावातून गुरुवारी संध्याकाळी आपले कार्यालयीन कामकाज आवरून घरी चालले होते. यावेळी खाडे हे कुडजे गावच्या स्मशानभूमी जवळ आले असता दुचाकीवरून आलेल्या दोन आरोपींनी खाडे यांच्या चारचाकी समोर बियरची बाटली फोडली आणि खाडे यांची गाडी अडवली. हॉर्न का वाजवला याचे कारण काढून त्यांनी वाद घालण्यास सुरुवात केली. त्यानंतर त्यांनी खाडे यांना जबरदस्तीने एका हॉटेलवर नेले आणि त्यांचे हात पाय बांधून ठेवले.
त्यानंतर अपहरणकर्त्यांनी एक औषधाची बाटली दाखवत ‘आत्ताच्या आत्ता पैसे दे नाहीतर तुला हे औषध पाजून मारून टाकू’ अशी धमकी दिली. घाबरलेल्या खाडे यांनी स्वतःच्या खात्यात असलेले ४९ हजार रुपये व आपल्या मित्राकडून आणखी २४ हजार मागून एकूण ७३ हजार रुपये आरोपींना ऑनलाईन गुगल पे करून दिले.
आरोपींनी खाडे यांचा मोबाईल व कारची चावी काढून घेत, उद्या आणखी दीड लाख रुपये आणून दे नाहीतर तुझ्यासह संपूर्ण कुटुंबाला मारून टाकू’ अशी धमकी देखील दिली आहे.
दरम्यान, या प्रकरणी उत्तम नगर पोलिसांनी गुन्हा दाखल केला असून विकास प्रकाश गायकवाड हा सराईत गुन्हेगार असून त्यांच्यावर संघटीत गुन्हेगारी (मोक्का) अंतर्गत करण्यात यावी अशी मागणी पुणे जिल्हा ग्रामसेवक संघटनेचे जिल्हाध्यक्ष श्रीकांत वाव्हळ यांनी केली आहे.
अधिक बातम्या वाचण्यासाठी येथे क्लिक करा….!
