Pune Crime News : पुणे, : शहरात पोलीस असल्याची बतावणी करून ज्येष्ठ नागरिकांची फसवणूक करणाऱ्या घटनांमध्ये मोठी वाढ झाली आहे. रविवारी (ता. १०) सायंकाळी वारजे माळवाडी पोलीस ठाण्याच्या हद्दीतील डुक्करखिंड परिसरात दोन चोरट्यांनी एका ६३ वर्षीय ज्येष्ठ नागरिकाला लुटले. चोरट्यांनी पोलीस असल्याचे भासवून त्यांच्याकडील २ लाख ५२ हजार रुपयांची सोनसाखळी आणि अंगठी हातचलाखीने चोरून नेली आहे.
तक्रारदार ६३ वर्षीय ज्येष्ठ नागरिक हे रविवारी सायंकाळी ६ च्या सुमारास मुंबई-बेंगळुरू बाह्यवळण मार्गावरील सेवा रस्त्याने चालण्यासाठी निघाले होते. यावेळी दुचाकीवरून आलेल्या दोन चोरट्यांनी त्यांना अडवले. “आम्ही पोलीस आहोत, या भागात लुटमारीच्या घटना वाढल्या आहेत, तुम्ही तुमचे दागिने काढून खिशात ठेवा,” अशी बतावणी चोरट्यांनी केली.
चोरट्यांनी ज्येष्ठाचा विश्वास संपादन करून त्यांचे दागिने एका कागदात बांधून देण्याचा बहाणा केला. त्यांना बोलण्यात गुंतवून ठेवून, संधी मिळताच दागिन्यांचा तो पुडा स्वतःकडे ठेवून घेत चोरटे दुचाकीवरून पसार झाले. घरी गेल्यावर कागदाच्या पुड्यात दागिने नसल्याचे लक्षात येताच त्यांना आपली फसवणूक झाल्याचे समजले.
दरम्यान, या प्रकरणी वारजे माळवाडी पोलीस ठाण्यात गुन्हा दाखल करण्यात आला असून, पोलीस उपनिरीक्षक संजय नरळे अधिक तपास करत आहेत. विशेष म्हणजे, मागील आठवड्याभरात पाषाण-सूस रस्ता आणि पौड रस्ता परिसरातही अशाच प्रकारे ज्येष्ठांना लुटण्याच्या घटना घडल्या आहेत.
