Inspiring story : भिगवण, (पुणे) : आजच्या धावपळीच्या आणि स्वार्थी युगातही माणुसकीचे दर्शन घडवणारी एक सुखद घटना इंदापूर तालुक्यातील पिंपळे येथे समोर आली आहे. पिंपळे पाटी येथील रहिवासी लता सुनील वाबळे यांनी रस्त्यात सापडलेले तब्बल 20 तोळे सोन्याचे दागिने कोणताही मोह न बाळगता मूळ मालकाला परत करून प्रामाणिकपणाचा एक नवा आदर्श समाजासमोर ठेवला आहे. Inspiring story
अकोले येथील एक कुटुंब पिंपळे येथील पद्मावती देवीच्या दर्शनासाठी आले होते. दर्शन घेऊन परतल्यानंतर, सोन्याचे दागिने असलेली आपली बॅग हरवल्याचे त्यांच्या लक्षात आले. यानंतर या कुटुंबाने तातडीने पिंपळे परिसरात धाव घेत मंदिर आणि रस्त्यांवर शोध सुरू केला. लता वाबळे या पिंपळे गाव ते पिंपळे पाटी या रस्त्यावरून जात असताना त्यांना एक बेवारस बॅग सापडली. Inspiring story
बॅग उघडून पाहिली असता, त्यात सोन्याचे मौल्यवान दागिने असल्याचे त्यांच्या निदर्शनास आले. त्यांनी कोणताही विचार न करता तात्काळ या घटनेची माहिती ग्रामस्थांना दिली आणि मूळ मालकाचा शोध घेण्यास सुरुवात केली. अखेर, हे दागिने अकोले येथील कुटुंबाचे असल्याचे स्पष्ट झाले. Inspiring story
लता वाबळे यांनी पूर्ण प्रामाणिकपणाने ते सर्व दागिने संबंधित कुटुंबाच्या स्वाधीन केले. आपले दागिने सुखरूप परत मिळाल्याने संबंधित कुटुंब भावूक झाले. या कौतुकास्पद कामगिरीची दखल घेत भिगवण पोलीस ठाण्याचे प्रभारी अधिकारी विनोद महांगडे आणि पोलीस उपनिरीक्षक अमित पाटील यांनी लता वाबळे व त्यांचे पती सुनील हरिभाऊ वाबळे यांचा सत्कार केला. Inspiring story
दरम्यान, आजही समाजात प्रामाणिक माणसे जिवंत आहेत, हेच या घटनेतून पुन्हा एकदा सिद्ध झाले आहे. वाबळे कुटुंबाच्या या कृतीचे संपूर्ण परिसरातून कौतुक होत आहे. Inspiring story
