पुणे : प्रेम प्रकरणावरून दोन अल्पवयीन मुलांमध्ये झालेल्या भांडणात एका विद्यार्थ्यावर कोयत्याने हल्ला करण्यात आल्याची घटना पुण्यात घडली आहे. या घटनेमुळे शहरात एकच खळबळ उडाली असून हल्ल्यात एक विद्यार्थी जखमी झाला आहे.
मिळालेल्या माहितीनुसार, पुण्यातील नुतन मराठी विद्यालय (नुमवी) या शाळेत शिकणाऱ्या विद्यार्थ्यांवर भर दिवसा कोयत्याने हल्ला करण्यात आला असून या हल्ल्यात एक विद्यार्थी जखमी झाला आहे. ज्याच्यावर हल्ला झाला आहे, तो पद्मवती या भागात राहायला असून तो १२ वीमध्ये शिक्षण घेत आहे. ज्याने हल्ला केला तो तुळशीबागेत काम करतो.
हल्ला झालेला मुलगा आरोपी मुलाच्या मैत्रिणीशी बोलत बस स्टॉपला बसला होता. याचा राग त्याला आला त्याने संबंधित विद्यार्थ्यावर कोयता उगारला आणि या हल्ल्यात त्याच्या शेजारी असलेल्या विद्यार्थ्याला देखील हा कोयता लागला.
दरम्यान, जखमी झालेल्या विद्यार्थ्याला हॉस्पिटलमध्ये उपचारासाठी दाखल करण्यात आले आहे. या प्रकरणी आरोपी विद्यार्थ्याला पोलिसांनी अटक केली आहे.
