पिंपरी-चिंचवड : सासरच्याकडून विवाहितेला वारंवार शिवीगाळ व टोमणे देत अपमानित केल्याचा प्रकार भोसरी येथून समोर आला आहे. सासरच्या लोकांकडून होणाऱ्या या छळा प्रकरणी विवाहितेने भोसरी पोलीस ठाण्यात तक्रार दाखल केली आहे. घरगुती कारणावरून छळ केल्या जात असल्याचे विवाहितेने तक्रारीमध्ये नमूद केले आहे. याप्रकरणी पतीसह सासरच्याकडील पाच जणांवर गुन्हा दाखल करण्यात आला आहे. हा प्रकार 20 एप्रिल 2018 ते 6 मार्च 2023 या कालावधीत भोसरी येथे घडला.
पती सुरेश उर्फ जितू धनराज वाघ, सासू, दीर विजय धनराज वाघ, नणंद, नंदावा दिलीप पाटील अशी गुन्हा दाखल झालेल्यांची नावे आहेत. याप्रकरणी पीडित विवाहितेने भोसरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, सासरच्या लोकांनी फिर्यादी विवाहितेला वारंवार शिवीगाळ, टोमणे अपमानित केले. फिर्यादीचा शारीरिक व मानसिक छळ करून त्यांना वारंवार माहेरी पाठवले. कल्याण येथील एका महिलेच्या घरी फिर्यादीस काम करण्यास भाग पाडले. मुलगा दत्तक देण्याच्या कारणावरून फिर्यादीवर दबाव टाकून त्यांना शिवीगाळ करत मारहाण केली असल्याचे फिर्यादीत म्हटले आहे. पुढील तपास भोसरी पोलीस करीत आहेत.
