Pandharpur News | पंढरपूर, (सोलापूर) : कानात हेडफोन घालून रुळावर चालत निघालेल्या तरुणाला रेल्वने दिलेल्या धडकेत एका ३२ वर्षीय तरुणाचा जागेवरच मृत्यू झाला आहे. ही घटना मंगळवारी (ता. २८) सकाळी साडेनऊ वाजण्याच्या सुमारास पंढरपूर तालुका पोलीस स्टेशनजवळील रेल्वे मार्गावर घडली आहे.
जयेश जाधव (वय ३२, रा. जुना कासेगाव रोड, पंढरपूर) असे अपघातात मृत्यू झालेल्या तरुणाचे नाव आहे.
रेल्वे पोलिसांनी दिलेल्या माहितीनुसार, जयेश जाधव हा मोलमजुरी करून आपल्या कुटुंबाचा उदरनिर्वाह करत होता. त्याची आई देखील एका खाजगी पॅथोलोजी सेंटरमध्ये कामाला आहे. काही दिवसांपूर्वी जयेशवर शस्त्रक्रिया झाली होती. शस्त्रक्रिया झाल्याने अनेक दिवसांपासून तो घरी आराम करत होता. तब्ब्येत बरी झाल्याने त्याने कामाला जाण्यासाठी आईकडे हट्ट धरला होता.
मंगळवारी सकाळी आधी आईला भेटावं आणि नंतर कामाला जावं, या विचाराने तो घरातून निघाला. मात्र कानात हेडफोन घालून तो रुळावर चालत निघाला होता. पाठीमागून मिरज-कुर्डुवाडी रेल्वेगाडी वेगात येत होती. कानातील हेडफोनमुळे रेल्वे चालकाने मारलेला हॉर्न जयेशला ऐकू गेला नाही. त्यामुळे पाठीमागून आलेल्या मिरज-कुर्डुवाडी या रेल्वेगाडीने जयेशला जोरदार धडक दिली. या धडकेत गंभीर जखमी झालेल्या जयेशचा जागीच मृत्यू झाला.
दरम्यान, रेल्वे रुळावर एका तरुणाला रेल्वेने चिरडल्याची माहिती वाऱ्यासारखी परिसरात पसरली. अपघात होताच मोठी गर्दी झाली होती. जयेशचे घर देखील याच परिसरात असल्याने त्याची लगेच ओळख पटली. त्याचे नुकतेच ऑपरेशन झाले होते आणि आजच तो कामावर चाललेला होता. अशी चर्चा करत नागरिक हळहळ व्यक्त करत होते.
अधिक तपास रेल्वे पोलीस संजय चिटनीस, एएसआय काझी आणि एसबी पाटील हे करत आहेत.
अधिक बातम्या वाचण्यासाठी येथे क्लिक करा…
