Nagar News कोतवाली, (नगर) : कोतवाली, तोफखाना पोलीस ठाण्याच्या हद्दीतून मोटारसायकलींची चोरी करणाऱ्या एका अट्टल चोरट्याला कोतवाली पोलिसांनी रिक्षासह ताब्यात घेतले आहे. (Nagar News)
एका रिक्षासह दोन लाखांचा मुद्देमाल जप्त
सुरज ऊर्फ सोनु शिवाजी शिंदे असे अट्टल चोरट्याचे नाव असून पोलिसांनी त्याच्याकडून एक रिक्षा व चार मोटारसायकल असा १ लाख ८५ हजार रुपयांचा मुद्देमाल जप्त केला आहे.
कोतवाली पोलीस ठाण्याचे वरिष्ठ पोलीस निरीक्षक चंद्रशेखर यादव यांनी दिलेल्या माहितीनुसार, अहमदनगर शहरात मोठया प्रमाणात मोटार सायकल चोरीचे प्रमाण वाढले असल्याने यादव यांनी मोटारसायकल चोरांचा शोध घेण्याच्या सूचना पोलिसांना दिल्या होत्या.
सदर घटनेचा पोलीस तपास करीत असताना पोलिसांना एका खबऱ्याकडून माहिती मिळाली कि, अहमदनगर शहरातील माळीवाडा बस स्टॅन्ड अहमदनगर परीसरात मोटार सायकल व रिक्षा चोरी करणारा इसम हा अॅटो रिक्षासह फिरत आहे. माहिती मिळताच पोलिसांनी सदर ठिकाणी सापळा रचून सदर इसमाला ताब्यात घेतले.
त्याच्याकडे चौकशी केली असता त्याने उडवाउडवीची माहिती देऊन रिक्षाची चुकीची माहिती दिली. त्याच्याकडे अधिक चौकशी केली असता त्याने सदरची रिक्षा हि चिखली पोलीस ठाण्याच्या हद्दीतून चोरून आणल्याची माहिती पोलिसांना दिली.
दरम्यान, अहमदनगर शहरात व परीसरात आणखी मोटर सायकल चोरी केल्याची कबुली पोलिसांना दिली. त्याच्याकडून पोलिसांनी १ लाख रुपयांची एक रिक्षा, व ८५ हजार रुपयांच्या चार मोटारसायकल पोलिसांनी जप्त केल्या आहेत. आरोपीवर यापूर्वीचे मोटरसायकल व इतर चोरीचे कोतवाली तसेच तोफखाना पोलीस स्टेशन येथे सात गुन्हे दाखल आहेत.
सदरची कामगिरी वरिष्ठ पोलीस निरीक्षक चंद्रशेखर यादव, पोलीस उपनिरीक्षक मनोज कचरे, पोलीस नाईक शाहीद शेख, प्रमोद लहारे, सुमित गवळी, दिपक रोहकले, सोमनाथ केकान, अशोक कांबळे, तसेच सायबर सेलचे नितीन शिंदे यांनी केली आहे. सदर गुन्हयाचा तपास हवालदार इखे करत आहेत.
