पुणे : जन्मदात्या मुलीवर शारीरिक अत्याचार करणाऱ्या नराधम बापाने पुणे शहराला पाणीपुरवठा करणाऱ्या वाहिनी लगत बाभळीच्या झाडाला ओढणीच्या सहाय्याने गळफास घेतल्याची घटना उघडकीस आली आहे.
बंडू लक्ष्मण ढवळे (वय ४३, रा. वाल्हेकर वस्ती, जिल्हा परिषद शाळेजवळ नांदेडगाव ता. हवेली जि. पुणे.) असे आत्महत्या करणाऱ्या आरोपी बापाचे नाव आहे.
पोलिसांनी दिलेल्या माहितीनुसार, रविवारी (ता. ०५) दुपारी दीड वाजण्याच्या सुमारास १९ वर्षीय मुलगी हि घरात एकटी असताना बाप बंडू ढवळे हा दारुच्या नशेत घरी आला.”तुला पोलीस भरती करायचेय, काय येईल तेवढा खर्च मी करणार आहे, मला तु खुप आवडतेस,” असं म्हणत नराधम बापाने मुलीसोबत अश्लील वर्तन सुरू केले. घाबरलेली मुलगी घराबाहेर पळाली व तिने कामाला गेलेल्या आईला रडतरडत घडलेला प्रसंग सांगितला. मुलीची आई कामावरुन घरी आली व मुलीला घेऊन थेट हवेली पोलीस ठाण्यात गेली.
मुलीच्या तक्रारीवरून नराधम बापाच्या विरोधात गुन्हा दाखल करुन माय-लेकी आपल्या मुळ गावी निघून गेल्या होत्या. तेव्हापासून हवेली पोलीस आरोपी बापाचा शोध घेत होते. शुक्रवारी (ता. १०) सकाळी नांदेड फाट्याजवळ एका बाभळीच्या झाडाला गळफास घेतलेल्या अवस्थेतील बंडू ढवळे याचा मृतदेह आढळून आल्यानंतर यामागील धक्कादायक घटनाक्रम समोर आला आहे.
दरम्यान, हवेली पोलीस ठाण्याचे पोलीस निरीक्षक सदाशिव शेलार, पोलीस हवालदार अशोक तारु व इतर कर्मचारी घटनास्थळी दाखल झाल्यानंतर आत्महत्या करणाऱ्या व्यक्तीचे नाव बंडू ढवळे असल्याचे निष्पन्न झाले.
पोलीसांनी अधिक तपास केल्यानंतर धक्कादायक माहिती समोर आली आहे. पोलीस निरीक्षक सदाशिव शेलार यांच्या मार्गदर्शनाखाली पोलीस हवालदार अजय पाटसकर व पोलीस हवालदार अशोक तारु याबाबत अधिक तपास करत आहेत.
