दौंड : पुणे ग्रामीण पोलिसांनी सराईत गुन्हेगारांविरोधातील मोहीम अधिक तीव्र करत दौंड शहरातील धोकादायक गुन्हेगार रितेश भीमराव गायकवाड (वय २७, रा. भीमनगर, दौंड) याच्यावर महाराष्ट्र प्रतिबंधक स्थानबद्धता (एमपीडीए) कायद्यांतर्गत कारवाई करत त्याला नागपूर मध्यवर्ती कारागृहात स्थानबद्ध केले आहे.
पुणे ग्रामीणचे पोलीस अधीक्षक संदीप सिंह गिल्ल यांनी जिल्ह्यातील जामिनावर बाहेर आलेल्या सराईत गुन्हेगारांची माहिती अद्ययावत करून त्यांच्यावर कठोर प्रतिबंधात्मक कारवाई करण्याचे आदेश दिले होते. त्यानुसार दरोडे, जबरी चोरी, खंडणी, खुनाचा प्रयत्न, अवैध शस्त्र बाळगणे तसेच महिला आणि अल्पवयीन मुलींवरील गंभीर गुन्ह्यांमध्ये सहभागी असलेल्या आरोपींवर एमपीडीए अंतर्गत कारवाई सुरू करण्यात आली.
तपासात रितेश गायकवाड याच्याविरुद्ध सात गंभीर गुन्हे दाखल असल्याचे समोर आले. त्यामध्ये घातक शस्त्रांनी हल्ला, जबर दुखापत, दरोडा, अल्पवयीन मुलीचा विनयभंग, विवस्त्र करण्याचा प्रयत्न, महिलांचा पाठलाग, दमदाटी आणि जबरदस्तीने मालमत्ता हिसकावून घेण्यासारख्या गंभीर स्वरूपाच्या गुन्ह्यांचा समावेश आहे.
दौंड पोलीस ठाण्याचे पोलीस निरीक्षक हेमंत शेडगे यांनी आरोपीविरुद्ध एमपीडीए कारवाईचा प्रस्ताव पोलीस अधीक्षकांकडे सादर केला होता. त्यानंतर हा प्रस्ताव जिल्हाधिकारी तथा जिल्हादंडाधिकारी जितेंद्र डुडी यांच्याकडे पाठविण्यात आला. प्रस्तावाची छाननी केल्यानंतर जिल्हाधिकाऱ्यांनी ३१ जुलै २०२६ रोजी एमपीडीए कायद्यानुसार स्थानबद्धतेचे आदेश जारी केले.
या आदेशानुसार दौंड पोलिसांनी विशेष पथके तयार करून २ ऑगस्ट २०२६ रोजी रितेश गायकवाडला ताब्यात घेत नागपूर मध्यवर्ती कारागृहात दाखल केले. ही कारवाई पोलीस अधीक्षक संदीप सिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी बापुराव दडस यांच्या मार्गदर्शनाखाली स्थानिक गुन्हे शाखा व दौंड पोलीस ठाण्याच्या अधिकाऱ्यांनी संयुक्तपणे पार पाडली.
दरम्यान, सराईत गुन्हेगारांविरोधातील ही कठोर कारवाई पाहता, पुणे ग्रामीण पोलिसांनी गुन्हेगारीला आळा घालण्यासाठी एमपीडीएचा प्रभावी वापर सुरू ठेवला असून, अशा प्रवृत्तीच्या गुन्हेगारांवर यापुढेही कठोर कारवाई केली जाणार असल्याचे संकेत मिळत आहेत.
