पुणे : पुण्यात गेल्या काही दिवसांपासून गुन्हेगारीच्या घटनांमध्ये वाढ होताना दिसत आहे. त्यात आता गुंतवणुकीवर चांगला परतावा देण्याचे आमिष दाखवून ९० लाख ७५ हजार रुपयांना गंडा घातल्याचा प्रकार समोर आला आहे. तसेच यामध्ये जादूटोणाही करण्यात आल्याचा आरोप आहे.
पुण्यातील रास्ता पेठ परिसरात चप्पलचे दुकान असलेल्या शेख अब्दुल बासीत अब्दुल लतिफ (वय ४५, रा.कोंढवा, पुणे) यांनी सहा आरोपींविरोधात समर्थ पोलीस ठाण्यात फिर्याद दिली. नादीर नईमाआवादी, सीमा नईमाआवादी व मौलाना आत्तार यांचा इम्पोर्ट व्यवसाय नाही हे इतर आरोपींना माहिती होते. तरीदेखील त्यांनी फसवणुकीच्या उद्देशाने आपापसात संगनमत करुन कट रचला. तक्रारदार शेख बासीत व त्यांची पत्नी यांचा विश्वास संपादन करुन गुंतवणुकीवर चांगला परतावा देण्याचे आमिष दाखवले. परदेशात व्यवसाय सुरु करण्याचे खोटे सांगितले.
तसेच त्यांनी जादूटोणासारखा प्रकारही केल्याचा आरोप आहे. यामध्ये ९० लाख ७५ हजार रुपयांची फसवणूक झाली. हा प्रकार २९ ऑगस्ट २०२० ते १९ ऑगस्ट २०२२ यादरम्यान घडल्याचे पोलिसांनी सांगितले.
दरम्यान, या फिर्यादीवरून पोलिसांनी अब्दुल हुसैन हसन अली नईमाआवादी (वय ४०, रा. कॅम्प, पुणे), सीमा नादीर नईमाआवादी (वय ३५), मौलाना शोएब मैनुद्दीन अत्तार (वय ३५, रा. बोपोडी, पुणे), माजीद उस्मान आत्तार (वय ५०), खालीद मैनुद्दीन आत्तार (वय ४०) व इरम शोएब आत्तार (वय ३२, रा. बोपोडी, पुणे) अशा सहा जणांविरोधात आर्थिक फसवणुकीचा गुन्हा दाखल केला आहे.
