Loni Kalbhor News लोणी काळभोर, ता. ८ : पुणे-सोलापूर महामार्गालगतच्या थेऊर फाटा परिसरात मध्यरात्री घडलेल्या एका धक्कादायक लुटमारीच्या घटनेने प्रवाशांमध्ये भीतीचे वातावरण निर्माण झाले आहे. मूळ गावी जात असताना थकवा आल्याने काही वेळ आराम करण्यासाठी थांबलेल्या तरुणाला तिघा अज्ञातांनी घेरून बेदम मारहाण केली आणि त्याची दुचाकी, मोबाईल, रोख रक्कम व बॅग जबरदस्तीने लुटून नेल्याची घटना शुक्रवारी (७ मे) रात्री साडेबारा वाजण्याच्या सुमारास घडली आहे. Loni Kalbhor News
या प्रकरणी अनिल सिद्धेश्वर काळे (वय २६) यांनी लोणी काळभोर पोलीस ठाण्यात फिर्याद दिली आहे. त्यानुसार तीन अनोळखी इसमांवर गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी अनिल काळे हे मूळचे लातूर जिल्ह्यातील असून सध्या चाकण येथील जामदार वस्ती परिसरात वास्तव्यास आहेत. ते महिंद्रा कंपनीत हेल्पर म्हणून नोकरी करत असून आपल्या टीव्हीएस रायडर दुचाकीवरून मूळ गावी सताळा (ता. अहमदपूर, जि. लातूर) येथे निघाले होते. Loni Kalbhor News
अनिल काळे यांनी ६ मे रोजी सायंकाळी सातच्या सुमारास चाकणहून प्रवास सुरू केला. सलग प्रवासामुळे थकवा जाणवत असल्याने ७ मे रोजी रात्री साडेबारा वाजण्याच्या सुमारास ते थेऊर फाटा परिसरातील काळभोरवाडा येथील एका मोकळ्या जागेत थोडा वेळ विश्रांतीसाठी थांबले. मात्र, काही क्षणांतच त्यांच्या आयुष्यात भीषण प्रसंग ओढवला. अनिल काळे हे विश्रांती घेत असताना काळ्या रंगाच्या अॅक्टिव्हा मोपेडवरून तिघे अज्ञात तरुण तेथे आले. “इथे का थांबला आहेस? ही थांबायची जागा आहे का?” असे म्हणत त्यांनी शिवीगाळ करण्यास सुरुवात केली.
अनिल यांनी “मी फक्त थोडा वेळ आरामासाठी थांबलो आहे,” असे सांगून समजावण्याचा प्रयत्न केला. मात्र आरोपींनी कोणतीही दया न दाखवता त्यांच्यावर हल्ला चढवला. त्यातील एका आरोपीने अनिल यांच्या खिशातील ओप्पो कंपनीचा मोबाईल आणि १८०० रुपये रोख रक्कम हिसकावून घेतली. दुसऱ्याने त्यांच्या हातातील बॅग आणि दुचाकीची चावी खेचून घेतली, तर तिसरा आरोपी धक्काबुक्की करत धमक्या देत होता. प्रतिकार करण्याचा प्रयत्न करताच आरोपींनी अनिल यांना मारहाण केली. हल्लेखोरांनी एमएच २४ बीटी ४४९५ क्रमांकाची काळ्या रंगाची टीव्हीएस रायडर दुचाकी, ओप्पो मोबाईल, रोख रक्कम आणि बॅग असा एकूण सुमारे ८२ हजार रुपयांचा ऐवज लुटून नेला. घटनेनंतर आरोपी अंधाराचा फायदा घेत पसार झाले. Loni Kalbhor News
दरम्यान, आरोपींपैकी एकाने निळा टी-शर्ट व जिन्स घातली होती, दुसऱ्याने पांढऱ्या रंगाचा डिझाईन असलेला टी-शर्ट व काळी पँट, तर तिसऱ्याने काळा टी-शर्ट व काळी पँट घातली होती. “त्यांचे चेहरे लाईटच्या उजेडात स्पष्ट दिसले असून पुन्हा पाहिल्यास ओळखू शकतो,” असे अनिल काळे यांनी पोलिसांना सांगितले आहे. या प्रकरणी लोणी काळभोर पोलीस ठाण्यात तीन अनोळखी इसमांच्या विरोधात भारतीय न्याय संहिता २०२३ अंतर्गत कलम ११५(२), ३०९(४), ३५१(२) आणि ३५२ अन्वये गुन्हा दाखल करण्यात आला असून पोलिसांकडून आरोपींचा शोध सुरू आहे.
