Loni Kalbhor News : लोणी काळभोर, ता.०७ : कुंजीरवाडी (ता. हवेली) ग्रामपंचायत हद्दीतील नवा मुठा उजवा कालव्यात (नवीन कॅनॉल) एका ३४ वर्षीय तरुणाचा मृतदेह आढळल्याचा धक्कादायक प्रकार समोर आला. गुरुवारी (ता.७) सकाळी अकरा वाजण्याच्या सुमारास ही घटना उघडकीस आली आहे.
मुठा उजवा कालव्यात धक्कादायक प्रकार
अशोक चिनकटे (वय-अंदाजे ३५, हडपसर, मूळ, रा. रत्नागिरी) असे मृत्यू झालेल्या तरूणाचे नाव आहे. मिळालेल्या माहितीनुसार, अशोक चिनकटे हा त्याच्या आईसोबत हडपसर परिसरात राहत होता. रोजंदारीवर मिळेल ते काम करून तो उदरनिर्वाह करत होता. मात्र, कुंजीरवाडी (ता. हवेली) येथील नवीन कॅनॉलमध्ये अशोकचा मृतदेह गुरुवारी (ता.७) सकाळी अकरा वाजण्याच्या सुमारास पाण्यात वाहत असताना काही नागरिकांना आढळून आला.
दरम्यान, या घटनेची माहिती नागरिकांनी तातडीने लोणी काळभोर पोलिसांना तत्काळ दिली. या घटनेची माहिती मिळताच, लोणी काळभोर पोलीस तातडीने घटनास्थळी दाखल झाले. पोलिसांनी नागरिकांच्या मदतीने तत्काळ मृतदेह बाहेर काढला. त्यानंतर पोलिसांनी मृतदेह ताब्यात घेऊन शवविच्छेदन करण्यासाठी पुण्यातील ससून रुग्णालयात पाठविला आहे.
मृत्यूचे कारण अस्पष्ट
अशोक चिनकटे याचा मृत्यू नेमका कसा झाला याची माहिती मिळू शकली नाही. मात्र, शवविच्छेदनाचा अहवाल आल्यानंतर मृत्यूचे कारण समोर येईल. याप्रकरणी लोणी काळभोर पोलीस ठाण्यात आकस्मिक नोंद करण्यात आला आहे. पुढील तपास लोणी काळभोर पोलीस ठाण्याचे पोलीस उपनिरीक्षक अमोल घोडके करत आहेत.
