लोणी काळभोर, ता. 24 : जमिनीच्या वादातून कदमवाकवस्तीच्या माजी सरपंचाने महिलेला अश्लील शिवीगाळ, दमदाटी करून कुटुंबाला मारण्याची धमकी दिल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीत सोमवारी (ता.20) सकाळी अकरा वाजण्याच्या सुमारास घडली आहे. लोणी काळभोर पोलीस ठाण्यात विनयभंगासह विविध गंभीर कलमान्वये गुन्हे दाखल करण्यात आले आहे. या घटनेमुळे परिसरात खळबळ उडाली आहे.
चित्तरंजन त्रिंबक गायकवाड असे गुन्हा दाखल करण्यात आलेल्या माजी सरपंचाचे नाव आहे. याप्रकरणी एका 48 वर्षीय महिलेने लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी या शेती व्यवसाय करून कुटुंबाचा उदरनिर्वाह करतात. त्यांच्या मालकीची सुमारे 25 गुंठे वडिलोपार्जित जमीन असून, एकत्रिकरण प्रक्रियेत झालेल्या त्रुटींमुळे जमिनीच्या नोंदीत गोंधळ निर्माण झाला आहे. यासंदर्भात त्यांनी भूमिअभिलेख कार्यालयात कायदेशीर प्रक्रिया सुरू केली असून प्रकरण अद्याप प्रलंबित आहे.
तक्रारदारांच्या शेजारील जमीनधारक चित्तरंजन गायकवाड व इतरांनी कथितपणे चुकीच्या फाळणी नकाशाच्या आधारे जमिनीची मोजणी करून घेतली आहे. यावरून दोन्ही बाजूंमध्ये वाद निर्माण झाला. 15 एप्रिल 2026 रोजी सकाळी शासकीय मोजणी सुरू असताना हा वाद चिघळला. तक्रारदार महिला शेतात काम करत असताना आरोपी घटनास्थळी आले आणि वादाच्या दरम्यान अश्लील शिवीगाळ करून अपमानित केले. यावेळी कुटुंबीयांनी विरोध केला असता, आरोपीने त्यांना उचकावण्याचा आणि खोटे गुन्हे दाखल करण्याची धमकी दिली आहे.
इतकेच नव्हे, तर जमिनीवर जबरदस्तीने कंपाउंड टाकण्याचा प्रयत्न करत ताबा मिळवण्याचा प्रयत्न करण्यात आला. तसेच “वीज कनेक्शन तोडून टाकू” अशा स्वरूपाच्या धमक्याही देण्यात आल्या. या सर्व प्रकारामुळे तक्रारदार महिला व त्यांचे कुटुंबीय भयभीत झाले होते. त्यानंतर 20 एप्रिल 2026 रोजी पुन्हा आरोपी चित्तरंजन गायकवाड शेतात येऊन ताबा घेण्याचा प्रयत्न केला आहे. “तुमच्यावर गुन्हे दाखल करू, तुम्हाला धडा शिकवू” अशा शब्दांत दमदाटी करून शिवीगाळ केली.
चित्तरंजन गायकवाड यांनी अश्लील शिवीगाळ केल्यामुळे पिडीता यांच्या स्त्री मनात लज्जा उत्पन्न झाली आहे. या प्रकरणी तक्रारदार महिलेने धैर्य दाखवत लोणी काळभोर पोलीस ठाण्यात धाव घेतली. त्यांच्या तक्रारीवरून चित्तरंजन गायकवाड यांच्या विरोधात भारतीय न्याय संहिता कलम 79, 351(2) व 352 अन्वये गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक रुपाली जाधव करत आहेत.
