(Loni Kalbhor Crime) लोणी काळभोर, (पुणे) : हडपसर – सासवड रस्त्यावरील दिवे घाट परिसरात दुचाकीचालकाला चाकूचा धाक दाखवून त्यांच्याकडील रोख रक्कम, मोबाईल व दुचाकी पळवून नेल्याची घटना घडली आहे.
याप्रकरणी गणेश प्रताप गायकवाड (वय ३८, रा. बऱ्हाणपूर, ता. बारामती) यांनी लोणी काळभोर पोलीस ठाण्यात फिर्याद दिली आहे. त्यानुसार पोलिसांनी अज्ञात व्यक्तीच्या विरोधात गुन्हा दाखल केला आहे.
मिळालेल्या माहितीनुसार…!
गणेश गायकवाड हे दिवे घाटातून हडपसर बाजूकडे निघाले होते. यावेळी घाटातील पहिल्या वळणावर दुचाकीस्वार गणेशला एका अज्ञात व्यक्तीने थांबविले व खाली सोडण्याची विनंती केली. त्यानंतर चोरट्याने दुचाकीस्वार गणेशला चाकुचा धाक दाखविला. त्याच्याकडील मोबाइल संच आणि तीन हजारांची रोकड काढून घेतली. गणेशची दुचाकी घेऊन चोरटा पसार झाला.
याप्रकरणी गणेश गायकवाड यांनी लोणी काळभोर पोलीस ठाण्यात फिर्याद दिली आहे. तपास पोलीस उपनिरीक्षक दाभाडे तपास करत आहेत.
