Loni Kalbhor लोणी काळभोर, ता. 15 : पुणे जिल्ह्यात गुटखा बंदी केवळ कागदावरच असल्याचे पुन्हा एकदा समोर आले असून, लोणी काळभोर परिसरात पोलिसांनी केलेल्या धडक कारवाईत तब्बल पाच लाखांहून अधिक किमतीचा प्रतिबंधित गुटखा, पान मसाला आणि तंबाखूजन्य पदार्थांचा साठा जप्त करण्यात आला आहे. विशेष म्हणजे हा संपूर्ण साठा एका महिलेच्या घरातून उघडकीस आल्याने परिसरात एकच खळबळ उडाली आहे. या कारवाईमुळे लोणी काळभोर परिसरात गुटखा माफियांचे मोठे जाळे सक्रिय असल्याची चर्चा रंगू लागली आहे. Loni Kalbhor
वैशाली संजय खेतमाळीस (वय ४८) असे गुन्हा दाखल करण्यात आलेल्या महिलेचे नाव आहे. याप्रकरणी पोलीस अंमलदार अशोक भागवत गिरी यांनी सरकारच्या वतीने लोणी काळभोर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, लोणी काळभोर पोलिसांचे व गुन्हे शाखा युनिट ६ चे पथक लोणी काळभोर पोलिस ठाण्याच्या हद्दीत बुधवारी (ता.13 ) गस्त घालत होते. गस्त घालत असताना, माळी मळा परिसरात एक महिला गुटख्याचा साठा करून विक्री करीत आहे. अशी माहिती पोलिसांना एका खबऱ्यामार्फत मिळाली होती. मिळालेल्या माहितीच्या अनुषंगाने पोलिसांनी सदर ठिकाणी छापा टाकला. Loni Kalbhor
घर नव्हे, गुटख्याचे गोदामच!
पोलिसांनी घरात प्रवेश करताच हॉलमध्ये मोठमोठ्या पोत्यांमध्ये आणि बॅगमध्ये भरून ठेवलेला गुटखा पाहून अधिकारीही चक्रावले. उघड्यावरच ठेवण्यात आलेल्या पोत्यांमध्ये डायरेक्टर स्पेशल पान मसाला, विमल पान मसाला, आर.एम.डी., रजनीगंधा, वी-१ तंबाखू, तुलसी तंबाखू, शॉट प्रीमियम च्युइंग टोबॅको यांसारख्या प्रतिबंधित पदार्थांचा मोठा साठा आढळून आला. Loni Kalbhor
दरम्यान, या छाप्यात पोलिसांनी एकूण ५ लाख ७ हजार १९९ रुपयांचा मुद्देमाल जप्त केला. महाराष्ट्र शासनाने बंदी घातलेले हे पदार्थ असून, त्यांची विक्री आणि साठवणूक गंभीर गुन्हा मानला जातो. तरीदेखील लोणी काळभोर परिसरात खुलेआम असा काळाबाजार सुरू असल्याचे उघड झाल्याने नागरिकांमध्ये संताप व्यक्त होत आहे. Loni Kalbhor
“कर्करोग विकणारा धंदा” सुरूच
गुटखा आणि सुगंधित तंबाखूमुळे मुखाचा कर्करोग, हृदयरोग आणि इतर गंभीर व्याधी होतात, हे माहिती असतानाही नफेखोरीसाठी हा जीवघेणा व्यवसाय सुरू असल्याचे पोलिस तपासात स्पष्ट झाले आहे. विशेष म्हणजे किराणा दुकानाच्या आडून हा साठा विक्रीसाठी ठेवण्यात आल्याची माहिती पुढे आली आहे.
पोलीसांनी पंचांसमक्ष सर्व मुद्देमाल जप्त करून नमुने सीलबंद केले असून उर्वरित साठा ताब्यात घेतला आहे. या प्रकरणी वैशाली खेतमाळीस यांच्याविरोधात अन्न सुरक्षा आणि मानके अधिनियम २००६ – 26(2)(i),26(2)(iv),30(2)(a),31 ; भारतीय न्याय संहिता (बी एन एस), 2023 – 123,223,274,275 प्रमाणे गुन्हा दाखल करण्यात आला आहे.
गुटखा रॅकेटच्या मोठ्या मास्यांचा शोध सुरू
एवढ्या मोठ्या प्रमाणावर गुटखा आणि तंबाखूजन्य पदार्थांचा साठा एका घरात पोहोचला कसा? यामागे कोणते पुरवठादार आहेत? पुणे जिल्ह्यातील इतर भागातही याचे नेटवर्क कार्यरत आहे का? याचा तपास आता पोलीस करत आहेत. या कारवाईमुळे गुटखा माफियांमध्ये खळबळ उडाली असून, आणखी काही धक्कादायक खुलासे होण्याची शक्यता व्यक्त केली जात आहे. Loni Kalbhor
