लोणावळा, (पुणे) : गुन्ह्याचा तपास करत असताना आरोपी निष्पन्न होऊन देखील आरोपी निष्पन्न न झाल्याचा अहवाल पाठविण्यासाठी लोणावळा ग्रामीण पोलीस ठाण्यातील सहाय्यक पोलीस निरीक्षकाने आरोपींकडे १ लाख ४० हजार रुपयांची लाच मागितल्याप्रकरणी गुन्हा दाखल करण्यात आला आहे.
देविदास हिरामण करंडे ( लोणावळा ग्रामीण पोलीस ठाणे, पुणे ग्रामीण) असे गुन्हा दाखल झालेल्या सहायक पोलीस निरीक्षकाचे नाव आहे. याप्रकरणी ३८ वर्षीय महिलेने लाचलुचपत प्रतिबंधक विभागाकडे (एसीबी) तक्रार केली होती.
लाचलुचपत प्रतिबंधक विभागाने दिलेल्या माहितीनुसार, तक्रारदार महिलेविरोधात ऑगस्ट २०२२मध्ये लोणावळा ग्रामीण पोलीस ठाण्यात एक गुन्हा दाखल आहे. त्या गुन्ह्याचा तपास सहाय्यक पोलीस निरीक्षक देविदास करंडे यांच्याकडे आहे. गुन्ह्याचा तपास करत असताना करंडे यांनी तक्रारदार महिलेकडे तपासाचा अ फायनल (गुन्ह्याचा तपास करत असताना आरोपी निष्पन्न झाले नाही. त्यामुळे हा गुन्हा कायम तपासावर ठेवण्यात येत आहे) अशा प्रकारचा अहवाल पाठवण्यासाठी ५० हजार रुपयांची लाच मागितली. याबाबत तक्रारदार महिलेने एसीबीकडे तक्रार केली.
दरम्यान, त्यानंतर एसीबीने या प्रकरणाची पडताळणी केली. त्यामध्ये सहाय्यक पोलीस निरीक्षक करंडे यांनी तक्रारदार महिलेसह गुन्ह्यातील इतर आरोपींकडे एकूण १ लाख ४० हजार रुपयांची लाच मागितल्याचे उघडकीस आले. त्यानुसार याप्रकरणी लोणावळा ग्रामीण पोलीस ठाण्यात गुन्हा दाखल करण्यात आला आहे. पुढील तपास पुणे लाचलुचपत प्रतिबंधक विभागाचे अधिकारी करीत आहेत.
