पुणे : दारू पिऊन सतत त्रास देणाऱ्या सख्ख्या लहान भावाचा गळा दाबून खून करणाऱ्या आरोपीला कोंढवा पोलिसांनी अटक केली आहे.
आकाश यशवंत भोसले (वय २९,रा. टिळेकरनगर, कोंढवा) अटक करण्यात आलेल्या आरोपीचे नाव आहे. तर तेजस यशवंत भोसले (वय २५) असे खून झालेल्या लहान भावाचे नाव आहे. या प्रकरणी आई सुनीता यशवंत भोसले (वय ५०) यांनी कोंढवा पोलीस ठाण्यात फिर्याद दिली आहे.
कोंढवा पोलीस ठाण्याचे सहायक पोलीस निरीक्षक हरिश शिळीमकर यांनी दिलेल्या माहितनुसार. तेजस आणि आकाश सख्खे भाऊ आहेत. तेजसला मद्य पिण्याचे व्यसन आहे. तेजस मद्य पिऊन कुटुंबीयांना सारखी शिवीगाळ करत होता. तर आकाश हा स्वतंत्र राहत होता.
शनिवारी (ता.१७) रात्री मद्य पिऊन घरी आल्यानंतर तेजसने शिवीगाळ केली. या घटनेची माहिती आई सुनीता हिने आकाशला दिली. त्यानंतर आकाश घरी आला. आकाश आणि तेजस यांच्यात वाद झाले. आकाशने तेजसचा गळा दाबला. आणि तेजस बेशुद्ध पडला. तेजसला उपचारासाठी दवाखान्यात दाखल करण्यात आले. परंतु, तेजसचा उपचारांपूर्वीच मृत्यू झाल्याची डॉक्टरांनी घोषित केले. सुनीता भोसले यांनी कोंढवा पोलीस ठाण्यात तक्रार दिली.
दरम्यान, कोंढवा पोलीस ठाण्यात गुन्हा दाखल होताच, पोलिसांनी आरोपी आकाश भोसले याला ताब्यात घेतले आहे. तरी, पुढील तपास कोंढवा पोलीस करीत आहेत.
