पुणे : शंकर चव्हाण यांच्यावर केलेल्या गोळीबाराचा बदला घेण्यासाठी ८ ते १० जणांच्या टोळक्याने दोघांवर सपासप वार करुन निर्घुण खून केल्याची घटना घडली आहे. येरवड्यातील लक्ष्मीनगरमधील पांडु लमाण वस्तीतील श्वेता चव्हाण यांच्या कार्यालयाबाहेर शनिवारी (ता. १२) पहाटे तीन वाजण्याच्या सुमारास हि घटना घडली आहे.
अनिल ऊर्फ पोपट वाल्हेकर व सुभाष ऊर्फ किसन राठोड अशी खून झालेल्या दोघांची नावे आहेत. याप्रकरणी सुभाष राठोड यांचा भाऊ लक्ष्मण राठोड याने येरवडा पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शंकर चव्हाण यांच्यावर सुभाष राठोड याने २००८ -०९ च्या गोळीबार केला होता. त्या गुन्ह्यात शिक्षा भोगून राठोड बाहेर आला होता.शनिवारी पहाटे तीन वाजण्याच्या सुमारास अनिल वाल्हेकर व सुभाष राठोड व त्यांचा आणखी एक साथीदार हे एका मोटारसायकल वरून निघाले होते.
यावेळी सदर ठिकाणी ८ ते १० जणांच्या टोळक्याने त्यांना अडविले. अडविले असता वरील दोघांवर त्यांनी सपासप वार करण्यास सुरुवात केली. यातच त्यांचा मृत्यू झाला आहे. त्यावेळी त्यांचा तिसरा साथीदार हा पळून गेला.
दरम्यान, ही घटना समजल्यानंतर वरिष्ठ पोलीस अधिकारी पहाटे घटनास्थळी पोहचले. त्यांनी घटनास्थळाची पाहणी करुन गुन्हा दाखल केला असून येरवडा पोलीस आरोपींचा शोध घेत आहेत. एकाला ताब्यात घेतल्याची माहिती समोर येत आहे.
