सागर घरत
करमाळा, (सोलापूर) : वंजारवाडी (ता. करमाळा) ग्रामपंचायत हद्द्दीत झालेल्या वृद्धाच्या खुनाचा उलगडा करमाळा पोलिसांनी २४ तासाच्या आत केला असून याप्रकरणी पोलिसांनी एका अल्पवयीन मुलाला ताब्यात घेतले आहे. सावत्र आईला आपल्या कुटुंबीयाविरोधात मदत करीत असल्याच्या राग मनात धरून अल्पवयीन मुलाने खून केल्याचे तपासात निष्पन्न झाले आहे.
वामन दराडे (वय – ६०, रा. अकोले, ता. इंदापूर) असे खून झालेल्या व्यक्तीचे नाव आहे.
पोलिसांनी दिलेल्या माहितीनुसार, सोमवारी (ता. १४) सकाळी वंजारवाडी (ता. करमाळा) ग्रामपंचायत हद्द्दीत एका वृद्ध व्यक्तीला डोक्यात खोरे मारून जखमी केले होते. यावेळी वृद्ध व्यक्तीचे उपचारादरम्यान मृत्यू झाला अशी महिती करमाळा पोलिसांना मिळाली होती. त्यानुसार अज्ञात व्यक्तीच्या विरोधात करमाळा पोलीस ठाण्यात गुन्हा दाखल करण्यात आला होता.
सदर घटनेचा पोलीस तपास करीत असताना पोलिसांना सदरची मारहाण हि अल्पवयीन मुलाने केली असल्याची माहिती मिळाली होती. मिळालेल्या माहितीच्या अनुशंघाने सदर अल्पवयीन मुलाला पोलिसांनी ताब्यात घेतले. त्याच्याकडे चौकशी केली असता त्याने वामन दराडे हा सावत्र आईला आपल्या कुटुंबीया विरोधात मदत करीत होता असा संशय होता.
दरम्यान, सकाळी अल्पवयीन मुलगा व दराडे हे शेतात काम करण्यासाठी गेले. त्यावेळी दराडे यांच्या डोक्यात खोरे घालून गंभीर जखमी करुन पळून गेला होता. सदर प्रकरणात घटना घडल्यानंतर पोलिस निरिक्षक जोतीराम गुंजवटे यांच्या मार्गदर्शनाखाली डी बी पथकाने संशयीतास शोधुन काढले व ताब्यात घेतले आहे. तापस करमाळा पोलीस करीत आहेत.
