पुणे : पुणे महानगरपालिका भरती प्रकरणात नोकरीचे आमिष दाखवून पैसे उकळणाऱ्या सिंहगड रस्ता क्षेत्रीय कार्यालयातील एका कनिष्ठ अभियंत्याला तडकाफडकी निलंबित करण्यात आले आहे. हे आदेश सामान्य प्रशासन विभागाचे उपायुक्त सचिन इथापे यांनी काल बुधवारी (ता.१९) दिले आहेत.
सूरज पवार असे कनिष्ठ अभियंत्याचे नाव असून त्यांची चौकशी सुरू करण्यात आली आहे.
मिळालेल्या माहितीनुसार, पुणे महापालिकेने ४४८ रिक्त जागांची भरती सुरू केली आहे. ऑनलाइन परीक्षेचा टप्पा पूर्ण झाला आहे. काही पदांचा निकाल जाहीर होऊन कागदपत्रांची पडताळणी करण्याचे काम सुरू आहे तर काहींचा निकाल अद्याप जाहीर झालेला नाही. महापालिकेच्या कनिष्ठ अभियंता पदासाठी कागदपत्र पडताळणीची प्रक्रिया सुरू आहे.
दरम्यान, सूरज पवार यांनी काही उमेदवारांशी संपर्क साधून पैसे उकळण्याचा प्रयत्न केला. पवार याने सुमारे ५ ते १० लाख रुपये असल्याची प्राथमिक माहिती आहे. याप्रकरणी अतिरिक्त आयुक्त रवींद्र बिनवडे यांच्याकडे तक्रार आली होती. तक्रार दाखल होताच बिनवडे यांनी पवार यांचे निलंबन करून चौकशीचे आदेश दिले.
सूरज पवार यांची सिंहगड रस्ता क्षेत्रीय कार्यालयाचे सहाय्यक आयुक्त प्रदीप आव्हाड यांना चौकशी करून अहवाल सादर करण्याचे आदेश दिले आहेत. तसेच पवार यांची खातेनिहाय चौकशी करण्यात येणार आहे. आणि पवार यांना पूर्व परवानगीशिवाय पुणे महानगरपालिका क्षेत्र सोडता येणार नाही.
