फलटण – मुसळधार पावसामुळे ओढ्याला पूर आलेल्या पुलावरील पाण्याचा अंदाज न आल्याने इर्टिका कार बुडून बापलेकीचा मृत्यू झाल्याची धक्कादायक घटना सोमंथळी (ता. फलटण) येथे घडली आहे.
छगन उत्तम मदने (वय-३८) व मुलगी प्रांजल मदने (वय-१३, दोघेही रा. वारूगड, ता. माण) अशी मृत्यू झालेल्या बापलेकीची नावे आहे.
मिळालेल्या माहितीनुसार, छगन मदने हे भारतीय सैन्यात कार्यरत आहेत. दिवाळीसाठी ते चार दिवसांपूर्वी गावी सुट्टीवर आले होते. मदने हे सासरे तुकाराम भंडलकर यांना भेटण्यासाठी सोमंथळी येथे चालले होते. सोमंथळी- सस्तेवाडी या रस्त्यावर असणाऱ्या ओढ्याला काल रात्री झालेल्या मुसळधार पावसामुळे मोठ्या प्रमाणात पाणी आले होते. आणि या पुलावरून पाणी वाहत होते. या पुलावरील पाण्याचा अंदाज न आल्याने मदने यांनी कर पाण्यात वाहून गेली.
दरम्यान, या घटनेची माहिती मिळताच विधान परिषदेचे माजी सभापती रामराजे नाईक निंबाळकर यांनी मध्यरात्री भरपावसात छत्री घेऊन घटनास्थळी मदत यंत्रणेला गती दिली. त्यानंतर ग्रामस्थ व जेसीबीच्या सहाय्याने मदने यांनी गाडी बाहेर काढण्यात आली. तेव्हा गाडीतील छगन मदने व त्यांची मुलगी प्रांजल मदने यांचे मृतदेह बाहेर काढून मृतदेह शवविच्छेदनासाठी फलटण येथील उपजिल्हा रुग्णालयात दाखल करण्यात आले.
