पुणे : पुण्यातून एक संतापजनक घटना समोर येत आहे. सोसायटीच्या पार्किंगमध्ये खेळत असलेल्या तीन अल्पवयीन मुलींसोबत अश्लील कृत्य करुन त्यांचा विनयभंग केल्याची धक्कादायक घटना घडली आहे. ही घटना कोंढवा परिसरात २ फेब्रुवारी रोजी रात्री साडेआठ आणि ४ फेब्रुवारीला रात्री आठ वाजण्याच्या सुमारास घडली आहे. याप्रकरणी कोंढवा पोलिसांनी आरोपीवर पोक्सो कायद्यांतर्गत गुन्हा दाखल करुन अटक केली आहे.
याबाबत पीडित मुलीच्या ३२ वर्षीय आईने सोमवारी ५ फेब्रुवारीला कोंढवा पोलीस ठाण्यात फिर्याद दिली आहे. यावरुन सावेज हासीम (वय-३१ रा. मिठानगर, पुणे) याच्यावर आयपीसी ३५४ सह पोक्सो अॅक्ट ८ आणि १२ नुसार गुन्हा दाखल केला असून त्याला अटक केली आहे.
पोलिसांनी दिलेल्या अधिक माहितीनुसार, आरोपी आणि फिर्यादी हे एकाच सोसायटीत राहतात. शुक्रवारी २ फेब्रुवारीला रात्री साडे आठ वाजण्याच्या सुमारास फिर्यादी यांची ९ वर्षाची मुलगी तिच्या १० वर्षाच्या दोन मैत्रिणीसोबत सोसायटीतील पार्किंगच्या मोकळ्या जागेत खेळत होत्या. त्यावेळी आरोपी त्या ठिकाणी आला आणि फिर्य़ादी यांच्या मुलीसह तिच्या दोन मैत्रिणीसोबत गैरवर्तन केले.
यानंतर दुसऱ्या दिवशी पुन्हा ४ फेब्रुवारीला रात्री आठच्या सुमारास मुली पार्किंगमध्ये खेळत असताना आरोपीने मुलींना चॉकलेट देऊन त्यांचा हात पकडला. या दरम्यान अल्पवयीन मुलींशी अश्लील कृत्य करुन त्यांच्या स्त्री मनास लज्जा उत्पन्न होईल असे वर्तन केले. हा प्रकार समोर येताच महिलेने कोंढवा पोलीस ठाण्यात धाव घेत आरोपी विरोधात तक्रार दाखल केली. यावरून पोलिसांनी आरोपीवर गुन्हा दाखल करुन अटक केली आहे. पुढील तपास सहायक पोलीस निरीक्षक जाधव करत आहेत.
