Indapur News इंदापूर, ता. 4 : तालुक्यातील उद्धट येथे सुरू असलेल्या उदमाईदेवी यात्रेत किरकोळ कारणावरून वाद चिघळत एक 23 वर्षीय तरुणाचा मृत्यू झाल्याची धक्कादायक घटना घडली. या प्रकरणी वालचंदनगर पोलिसांनी आईस्क्रीम गाडी चालकावर खुनाचा गुन्हा दाखल केला आहे. Indapur News
दादा रावण इंगळे (वय 23, रा. उद्धट, ता. इंदापूर) असे मृत तरुणाचे नाव आहे. तर किसन शंकरलाल प्रजापती (सध्या रा. बरड, ता. फलटण, जि. सातारा; मूळ रा. राजस्थान) याच्याविरुद्ध गुन्हा नोंदवण्यात आला आहे. फिर्यादी सुरज हिंमत तुपे (वय 23) यांनी वालचंदनगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, उदमाईदेवी यात्रेनिमित्त सुरज तुपे आणि त्यांचा मित्र दादा इंगळे हे मंदिर परिसरात फिरत होते. यावेळी भैरवनाथ आईस्क्रीम गाडीवर फालुदा खाण्यासाठी गेले असता, सुट्टे पैसे देण्याच्या कारणावरून विक्रेत्यासोबत त्यांचा वाद झाला.
दरम्यान, वाद चिघळल्यानंतर आरोपीने संतापाच्या भरात दादा इंगळे याला जोरात ढकलून दिल्याचा आरोप आहे. या धक्क्यामुळे इंगळे रस्त्यावर पडला आणि डोक्याला गंभीर मार लागला. जखमी अवस्थेत त्याला उपचारासाठी नेण्यात आले; मात्र उपचारापूर्वीच त्याचा मृत्यू झाला. Indapur News
या घटनेनंतर पोलिसांनी तातडीने कारवाई करत आरोपीविरुद्ध खुनाचा गुन्हा दाखल केला आहे. पुढील तपास उपविभागीय पोलिस अधिकारी डॉ. सुदर्शन राठोड यांच्या मार्गदर्शनाखाली वालचंदनगर पोलिस ठाण्याचे सहायक पोलिस निरीक्षक राजकुमार डुणगे करत आहेत.
