शिक्रापूर : बाप-आणि मुलीच्या नात्याला काळिमा फासणारी घटना शिरुर तालुक्यात घडली आहे. नववीत शिकणाऱ्या मुलीचा विनय- भंग चक्क तिच्याच जन्मदात्याने केल्याची धक्कादायक घटना सणसवाडी (ता. शिरुर) येथे नुकतीच उघडकीस आली आहे.
याप्रकरणी पिडीत मुलीच्या आईने शिक्रापूर पोलीस ठाण्यात फिर्याद दिली. त्यानुसार नराधम बापावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी यांची मुलगी सणसवाडी (ता. शिरुर) येथील एका शाळेत नववीच्या वर्गात शिक्षण घेत आहे. एके दिवशी मुलगी झोपल्यानंतर वडील तिच्याजवळ येऊन लगट करीत होते. तसेच मनास लज्जा उत्पन्न होईल, असे कृत्य केले. यामुळे पिडीत मुलगी रडत बसली होती.
दरम्यान, पिडीत मुलीची आई कामावरून घरी आल्यानंतर मुलगी रडत होती. आईने रडण्याचे कारण विचारले असता तिने वरील प्रकार सांगितला. तसेच यापूर्वी देखील अनेकदा तिने मला एकटी असल्याचे पाहून असे कृत्य केले आहे, असे मुलीने आईला सांगितले. तेव्हा आईच्या पायाखालची जमीन सरकली.
मुलीच्या आईने तातडीने शिक्रापूर पोलीस ठाणे गाठले व पतीच्या विरोधात तक्रार दिली. त्यानंतर पोलिसांनी अल्पवयीन मुलीच्या नराधम बापाविरुद्ध गुन्हा दाखल करण्यात आला. पुढील तपास शिक्रापूर पोलीस ठाण्याचे पोलीस उपनिरीक्षक अमोल खटावकर करीत आहेत.
