दौंड : दौंड शहरातील महालक्ष्मी हॉस्पिटल परिसरात किरकोळ अपघाताच्या कारणावरून 6 जणांच्या टोळक्याने एका कुटुंबावर पिस्तूल, कोयता, लोखंडी रॉड आणि हॉकी स्टिकने प्राणघातक हल्ला केल्याची घटना घडली आहे. फिर्यादी, त्यांची आई, आजी व मावस भावांवर जीवघेणा हल्ला चढवून गंभीर जखमी करणाऱ्या या टोळक्याविरुद्ध दौंड पोलीस ठाण्यात खुनाच्या प्रयत्नासह विविध कलमांन्वये गुन्हा दाखल करण्यात आला आहे. याप्रकरणी दौंड पोलिसांनी तात्काळ सहा आरोपींना बेड्या ठोकल्या आहेत.
अशपाक अन्सार सय्यद (रा. बालाजी नगर, दौंड), कृष्णा भूपेंद्र भूल (सध्या रा. गोपाळवाडी, ता. दौंड, मूळ रा. अछाम, नेपाळ), अमोल ज्ञानेश्वर मुळे (रा. शिवाजीनगर, खवठे हॉस्पिटलमागे, दौंड), झहीर नजीर सय्यद (रा. बिलावल गार्डन, दौंड), सज्जस शौकत सय्यद (रा. पर्ल पार्क अपार्टमेंट, बिलावल गार्डन, दौंड) व तबरेज शौकत सय्यद (रा. पर्ल पार्क अपार्टमेंट, बिलावल गार्डन, दौंड) अशी अटक करण्यात आलेल्या आरोपींची नावे आहेत. याबाबत यश नवनाथ गायकवाड (वय -20, व्यवसाय शिक्षण रा. कासुर्डी, ता. दौंड जि. पुणे) यांनी दौंड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, कासुर्डी (ता. दौंड) येथील महाविद्यालयीन विद्यार्थी यश नवनाथ गायकवाड हे सोमवारी (ता. 24) दुपारी साडेचार वाजण्याच्या सुमारास आपल्या कुटुंबासह कारमधून महालक्ष्मी हॉस्पिटल परिसरातून जात होते. त्यावेळी आरोपी कृष्णा भूल याने आपल्या ताब्यातील दुचाकीने यश यांच्या कारला धडक दिली. या अपघातात कारचे नुकसान झाल्याने यश यांनी नुकसानभरपाई मागितली. याचाच राग मनात धरून आरोपींनी तात्काळ आपल्या इतर साथीदारांना बोलावून घेतले.
काही वेळातच 6 जणांचे टोळके हातात प्राणघातक शस्त्रे घेऊन घटनास्थळी आले. यावेळी झहीर सय्यद याच्या हातात कोयता होता. तर सज्जस सय्यद याच्या हातात लोखंडी रॉड होता. तबरेज सय्यद याने आपल्या कमरेला पिस्तूल लावले होते. अशपाक सय्यद व इतर 4 ते 5 जण हातात हॉकी स्टिक घेऊन आले होते. या सर्व आरोपींनी जिवे मारण्याच्या उद्देशाने यश गायकवाड, त्यांची आई, आजी आणि मावस भाऊ मंथन व स्वानंद यांच्यावर तुफान चढवला. टोळक्याने केलेल्या या हिंसक मारहाणीत मंथन आणि स्वानंद हे दोघे गंभीर जखमी झाले.
दरम्यान, भरदिवसा मुख्य रस्त्यावर झालेल्या या हिंसक गुंडगिरीमुळे दौंड शहरात प्रचंड खळबळ उडाली होती. घटनेची माहिती मिळताच दौंड पोलीस ठाण्यात विविध गंभीर कलमांखाली गुन्हा दाखल करण्यात आला होता. दौंड पोलिसांनी रात्रीच्या वेळी कोम्बिंग ऑपरेशन राबवून सर्व 6 आरोपींचा शोध घेतला आणि पहाटे दोन वाजण्याच्या सुमारास सर्वांना बेड्या ठोकल्या. या गुन्ह्याचा पुढील सखोल तपास सहाय्यक पोलीस निरीक्षक अमोल गवळी करत आहेत
