उरुळी कांचन, (पुणे) : पुणे सोलापूर महामार्गावरील बोरीपार्धी (ता. दौंड) (धायगुडवाडी) ग्रामपंचायत हद्दीतील हॉटेल जोगेश्वरीसमोर भरधाव टेम्पोने दुचाकीला दिलेल्या धडकेत दोघेजण जागीच ठार झाल्याची घटना घडली आहे. गुरुवारी (ता. १६) दुपारी साडेबारा वाजण्याच्या सुमारास ही घटना घडली.
किस्तुरचंद गडालाल शर्मा (वय ६६, रा. नागपूर) आणि गिरीधरलाल शिवकरजी शर्मा (वय ४७, रा. राजस्थान) अशी अपघातात मृत्यू झालेल्या दोघांची नावे आहेत.
मिळालेल्या माहितीनुसार, किस्तुरचंद शर्मा व गिरीधरलाल शर्मा हे दोघेजण कोळशाचा व्यापर करीत होते. गुरुवारी दुपारी दोघेजण दुचाकीवरून सोलापूरकडे जात होते. त्यावेळी केडगाव बाजारपेठेतून तेल पॅकिंग घेऊन जाणारा टेम्पो हा देखील सोलापूरच्या दिशेने निघाला होता. यावेळी साडेबारा वाजण्याच्या सुमारास बोरीपार्धी येथे या टेम्पोने दुचाकी जोरदार धडक दिली.
धडकेनंतर दुचाकी टेम्पोच्या पुढील चाकात अडकली व त्या दुचाकीला टेम्पोने काही अंतर फरफटत नेले. यावेळी दुचाकीवर प्रवास करणाऱ्या दोघांचा जागीच मृत्यू झाला.
दरम्यान, ज्या अपघात घडलेल्या ठिकाणी महामार्गावर रस्ता क्रॉसिंगसाठी जागा ठेवली आहे. यापुर्वी देखील याच ठिकाणी तीन वेळा अपघात घडले आहेत. हा क्रॉसिंग मार्ग बंद करण्याची मागणी परिसरातून होऊ लागली आहे. पुढील तपास यवत पोलीस करीत आहेत.
