Baramati News : बारामती, (पुणे) : ट्रकमधून माल घेऊन निघालेल्या ट्रक चालकाचे अपहरण करून त्याच्या वाहनातून तब्बल ३५ लाख रुपयांचे लोखंडी रॉड व १८ लाख रुपयांची ट्रक असा ५३ लाख रुपयांचा दरोडा टाकलेल्या टोळीच्या मुसक्या बारामती ग्रामीण पोलिसांनी अवघ्या दोन तासात आवळल्या आहेत. मंगळवारी (ता. ०९) हि घटना घडली आहे.
दिग्विजय श्रीकांत जाधव (वय २१), लक्ष्मण भीमराव कुचेकर (वय ३०), सुहास रावसाहेब थोरात (वय २८, तिघे रा. उदमाईवाडी, ता. इंदापूर, जि. पुणे), प्रथमेश मनोज शेलार (वय २३, रा. घोलपवाडी, ता. इंदापूर), मयुर प्रकाश शिंदे (वय २८, रा. तावशी, ता. इंदापूर) व स्वप्नील दत्तात्रय निंबाळकर (वय २८, रा. ३९ फाटा, सणसर, ता. इंदापूर) अशी पोलिसांनी अटक केलेल्या दरोडेखोरांची नावे आहेत. या प्रकरणी मारुती मोतीलाल करांडे (वय ३०, रा. आसंगी, ता. जत, जि. सांगली) यांनी बारामती ग्रामीण पोलीस ठाण्यात फिर्याद दिली होती.
पोलिसांनी दिलेल्या माहितीनुसार,
मंगळवारी करांडे हे स्वतःच्या मालकीचा अशोक लेलॅण्ड ट्रक मधून बारामती एमआयडीसीतील माऊली कृपा ट्रान्सपोर्टमार्फत कर्नाटक येथून लोखंडी रॉड भरून पुण्यात मुंढवा येथील भारत फोर्जमध्ये घेऊन जाण्यासाठी निघाले होते. भिगवणजवळ बबिता ढाबा येथे ते पहाटे ३ च्या सुमारास जेवणासाठी थांबले. त्यानंतर ते गाडीतच झोपले असताना दरवाजा उघडून तिघांनी आत येत त्यांना दमदाटी करत चार हजार रुपये व मोबाईल काढून घेतला.
ट्रेलर चालू करून तो बारामतीच्या दिशेने आणला. भिगवणमध्ये त्यांना आणखी तीन साथीदार मिळाले. त्यांनी या ट्रकमधून ३५ लाख रुपये किमतीचे लोखंडी रॉड चोरले. तसेच १९ लाख रुपयांचे वाहनही त्यांनी नेले. करांडे यांनी दिलेल्या फिर्यादीवरून पोलिसांनी अज्ञातांविरोधात दरोड्याचा व जबरी अपहरणाचा गुन्हा दाखल केला होता.
बारामती तालुक्यातील कन्हेरी गावच्या हद्दीत पालखी महामार्गालगत त्यांनी हे वाहन आणले. तेथून दुसऱ्या वाहनात हे रॉड टाकून ते दुसरीकडे नेवून विकण्याचा त्यांचा हेतू होता. करांडे यांनी त्यांच्या तावडीतून सुटका करून घेत बारामती तालुका पोलिस ठाणे गाठले. पोलिसांनी घटनेचे गांभीर्य लक्षात घेत तात्काळ पथके रवाना केली.
दरम्यान, पोलिस ठाण्यात गुन्हा दाखल होण्याचे काम सुरु असतानाच ट्रेलरसह दोन दरोडेखोरांना जागीच पकडण्यात आले. त्यांच्याकडून इतर साथीदारांची माहिती घेत आजूबाजूच्या झाडाझुडपात लपून बसलेल्या अन्य चार जणांना पाठलाग करून ताब्यात घेण्यात आले आहे. तपास पोलीस करीत आहेत.
अधिक बातम्या वाचण्यासाठी येथे क्लिक करा..
