पुणे : पुण्यातील जर्मन बेकरी बॉम्ब ब्लास्ट प्रकरणात पॉप्युलर फ्रंट ऑफ इंडिया या संघटनेचा प्रत्यक्ष सहभाग असल्याची माहिती दहशतवाद विरोधी पथकाने नाशिक जिल्हा न्यायालयात दिली आहे. यामुळे संपूर्ण गुन्हेगारी विश्वात एकच खळबळ उडाली आहे.
राष्ट्रीय केंद्रीय यंत्रणा, ईडी आणि दहशतवाद विरोधी पथकाने देशभरात छापे टाकून पॉप्युलर फ्रंट ऑफ इंडियाच्या संशयित कार्यकत्यांना अटक केली आहे. पुणे, नाशिक, सोलापूर सह केरळमधून १०० हून अधिक संशयितांना अटक केली आहे. दहशतवाद विरोधी पथकाने नाशिकच्या मालेगावसह पुणे, बीड आणि कोल्हापूर येथील ५ जणांना अटक केली होती.
त्यानंतर पॉप्युलर फ्रंट ऑफ इंडियाच्या संशयित कार्यकत्यांना नाशिक जिल्हा न्यायालयात हजर करण्यात आले होते. त्यावेळी ३ ऑक्टोबरपर्यन्त त्यांना एटीएसची कोठडी देण्यात आली होती. त्यानुसार तपासा दरम्यान मोठे पुरावे हाती लागले असून धक्कादायक बाब म्हणजे न्यायालयात एटीएसने पुण्यातील जर्मन बेकरी बॉम्बब्लास्ट प्रकरणात पीएफआयचा प्रत्यक्ष सहभाग असल्याची माहिती दिली आहे. पॉप्युलर फ्रंट ऑफ इंडियाच्या पाचही संशयितांना नाशिक जिल्हा न्यायालयाने १७ तारखेपर्यंत १४ दिवसांची पोलिस कोठडी सुनावली आहे.
दरम्यान, मालेगावातून मौलाना सैफुर्रहमान सईद अन्सारी, पुण्यातून अब्दुल कय्युम बादुल्ला शेख, रझी अहमद खान, बीडमधून वसीम अझीम ऊर्फ मुन्ना शेख, कोल्हापुरातून मौला नसीसाब मुल्ला यांना एटीएसने अटक केली होती. या अटक करण्यात आलेल्या व्यक्तींच्या बँक खात्यात मोठ्या रक्कमांचा व्यवहार दिसून येत असून आणखी मोठे खुलासे समोर येण्याची शक्यता आहे.
