पुणे : पुण्यात मागील काही दिवसांपासून कोयता गॅंगने दहशत माजविताना अनेक परिसरात धुमाकूळ घातला. अनेक व्यापाऱ्यांच्या दुकानाची तोडफोड करताना नुकसान केले. पोलिसांनी या टोळीतील दोघांना अटक केली होती.
ज्या ठिकाणी या आरोपींनी दहशत माजवली होती, त्याच ठिकाणी पोलिसांनी त्यांची धिंड काढली. अनवाणी पायाने पोलिसांनी त्यांना संपूर्ण परिसरातून फिरवले. दहशत वाजवणाऱ्या या गुंडांची अशी अवस्था पाहून परिसरातील नागरिकांनी समाधान व्यक्त केले.
कोयता गॅंगच्या विरोधात पुणे पोलिसांनी ‘कॉंम्बिंग ऑपरेशन’ हाती घेतले आहे. पोलीस रात्री मोठ्या प्रमाणात गस्त घालत असून आतापर्यंत सुमारे ७०० गुन्हेगारांची झाडाझडती घेतली आहे. यात अनेक आरोपीना अटक केली आहे. कोयता गॅंगचा म्होरक्या असलेला बिट्ट्या कुचेकर, साहिल शेख आणि आकाश कांबळे यांना अटक करण्यात आली आहे.
मात्र अजूनही कोयता गॅंगमधील अनेक गुन्हेगार पुण्याच्या रस्त्यांवर दहशत निर्माण करताना दिसत आहे. त्यांच्यावर योग्य कारवाई करुन त्यांना जेरबंद करण्याचे मोठे आव्हान पुणे पोलिसांसमोर आहे.
