पुणे : वाघोली येथील लेक्सिकॉन इंटरनॅशनल स्कूलची फी भरली नसल्याने विद्यार्थ्यांना शाळा सुटल्यानंतर डांबून ठेवण्यात आल्याचा प्रकार उघडकीस आला असून याप्रकणी पालकांनी व मनसे पदाधिकारी स्कूल विरोधात लोणीकंद पोलिस ठाण्यात फिर्याद दिली आहे.
मिळालेल्या माहितीनुसार स्कूलमध्ये बुधवारी (ता. १८) दुपारी एक वाजता विद्यार्थ्यांची घरी जाण्यासाठी सुट्टी झाल्यानंतर काही मुलांना शाळेतच थांबविण्यात आले व पालकांना फी भरण्यासंदर्भात सांगण्यात आले. ‘फी भरा आणि मुलांना घेऊन जा’ असे शाळेकडून सांगण्यात आल्याचे काही पालकांनी सांगितले. फी न भरलेल्या विद्यार्थ्यांचे पालक धावत शाळेत पोचले आणि त्यांनी शाळा प्रशासनाकडे या प्रकाराबाबत विचारणा केली.
त्यावेळी, मनसे पदाधिकारी व पालक यांनी एकत्रित शाळेच्या प्राचार्यांना तीव्र शब्दांत जाब विचारला. पालकांचा रोष पाहता लोणीकंद पोलिसांना देखील मध्यस्तीसाठी बोलाविण्यात आले.
काही पालक मुलांना घेण्यासाठी वर्गात गेले असता, त्यांना मुलांना भेटू दिले जात नसल्याचा आरोपही पालकांनी केला. या प्रकरणात पोलिसांनी आक्रमक पालक, मनसे कार्यकर्ते व शाळा प्रशासन यांच्यात मध्यस्थी करण्याचा प्रयत्न केला गेला.
यानंतर मुलांना पालकांच्या ताब्यात देण्यात आले. यावेळी संतप्त पालक व मनसे पदाधिकारी यांनी शाळेच्या विरोधात लोणीकंद पोलिस ठाण्यात फी भरली नसल्याने मुलांना डांबून ठेवल्याची लेखी तक्रार दाखल करून खंडणी, अपहरणाचा गुन्हा दाखल करावा अशी मागणी केली आहे.
