पुणे : कुरिअरच्या माध्यमातून गांजा आणि चरसची ऑनलाईन विक्री करणाऱ्या दोघांना गुन्हे शाखेच्या अमली पदार्थ विरोधी पथक पथकाने अटक केली आहे.
हर्षद दत्तात्रय इंगळे (वय २१ रा. दापोडी), भागवत शेषनारायण सुरनर (वय २० रा. बावधन) अशी अटक करण्यात आलेल्यांची नावे आहेत.
त्यांच्याकडून तीन किलो गांजा आणि १०४ ग्राम चरस जप्त करण्यात आले आहे. शहरात ऑनलाईन पद्धतीने गांजा आणि चरसची विक्री होत असल्याची माहिती अंमली पदार्थ विरोधी पथकाला मिळाली होती.
यानुसार वरिष्ठ निरीक्षक विनायक गायकवाड यांच्या पथक गस्ती वर होते, या दरम्यान पथकाला दोघे पुणे-बेंगलोर महामार्गावरील सनसिटी बायपास येथे ऑनलाइन गांजा व चरस विक्रीसाठी येणार असल्याची माहिती मिळाली.
यानुसार पथकाने सापळा रचून हर्षद इंगळे आणि भागवत सुरनर यांना ताब्यात घेतले असता त्यांच्याकडे ३ किलो ६८१ ग्राम गांजा व १०४ ग्राम चरस आढळून आले. यानुसार त्यांच्यावर गुन्हा दाखल करून त्यांना अटक करण्यात आले आहे.
गुन्हे शाखेचे अप्पर पोलीस आयुक्त रामनाथ पोकळे, उपायुक्त अमोल झेंडे, सहाय्यक आयुक्त गजानन टोम्पे यांच्या मार्गदर्शनाखाली वरिष्ठ निरीक्षक विनायक गायकवाड, सहाय्यक निरीक्षक शैलजा जानकर, अंमलदार विशाल शिंदे, योगेश मोहिते, प्रवीण उत्तेकर, पांडुरंग पवार यांच्यासह पथकाने ही कारवाई केली.
