शिरूर : ‘कामधंदा करत नाही रोजच दारु पिउन शिवीगाळ करताय’, असे पतीला म्हणाल्याच्या कारणावरून एका महिलेला पती व सासु, सासऱ्याने काठीने बेदम मारहाण केल्याची घटना मलठण (ता. शिरुर) येथे घडली आहे. पतीसह सासु सासऱ्यांवर शिरूर पोलीस ठाण्यात गुन्हा दाखल करण्यात आला आहे.
पती प्रदिप थोरात , सासू सिंधुबाई थोरात, सासरे गुलाब बाळाजी थोरात (सर्व रा .मलठण, थोरात वस्ती ता. शिरुर ) असे गुन्हा दाखल करण्यात आलेल्या आरोपींची नावी आहेत. स्वाती प्रदिप थोरात असे फिर्याद दिलेल्या महिलेचे नाव आहे.
पोलिसांनी दिलेल्या माहितीनुसार, बुधवारी (ता. १८) रोजी रात्री ७:३० वाजता फिर्यादी महिला घरात झाडु मारत असताना पती प्रदिप गुलाब थोरात हे फिर्यादी व तिची मुलगी सिद्धी हिला शिवीगाळ करत होता.
त्यानंतर तुम्ही काही कामधंदा करत नाही रोजच दारु पिऊन शिवीगाळ करता असे फिर्यादी महिलेने म्हटल्यावर, आरोपी पतीला राग आला. त्यानंतर सासु सिंधुबाई, सासरे गुलाब थोरात यांनी फिर्यादी महिलेला दोन्ही हाताला धरले असता पती प्रदिप यांनी काठीने मारहाण करुन त्यांना गंभीर जखमी केले.
दरम्यान, या प्रकरणी स्वाती थोरात यांनी शिरूर पोलीस ठाण्यात फिर्याद दिली. त्यानुसार पतीसह सासु सासऱ्यांवर गुन्हा दाखल करण्यात आला असून या घटनेचा पुढील तपास पोलीस करीत आहेत.
