हडपसर : घरातील सर्वजण सिनेमा पहायला गेले असल्याची संधी साधून जवयानेच बनावट चावीने सदनिका उघडून सासऱ्याच्या घरात ३ लाख ५० हजार रुपये किमतीचे दागिने चोरल्याची घटना उघडकीस आली आहे. याप्रकरणी हडपसर पोलिसांनी आरोपी जावयास अटक केली आहे.
निखील संभाजी पवार (वय-२३, रा. संभाजीनगर चाळ, जयसिंगपुर, कोल्हापुर) असे अटक करण्यात आलेल्या जावयाचे नाव आहे. त्याच्याकडून पोलिसांनी ७० ग्रॅम वजनाचे ३ लाख ५० हजार रुपयांचे दागिने जप्त केले आहेत.
पोलिसांनी दिलेल्या माहितीनुसार, रविवारी (ता. १०) दुपारी अडीच वाजण्याच्या सुमारास विश्वजीत अशोक कांबळे रा. इंद्रायणी सोसायटी, साडेसतरा नळी, हडपसर यांनी घरफोडी झाल्याची तक्रार हडपसर पोलीस ठाण्यात दिली होती. त्यानुसार सदर घटनेचा तपास करीत असताना घरामध्ये कोणत्याही प्रकारची तोडफोड अगर कोणत्याही इतर वस्तुस हात लागलेला नसल्याने दिसून आले. त्यामुळे चोरी हि घरातील ओळखीच्या व्यक्तीने केल्याचा संशय पोलिसांना होता.
त्यानुसार, पोलीस अंमलदार प्रशांत दुधाळ यांचे माहितीवरून जावई निखील पवार याच्याकडे अधिक चौकशी केली असता त्याने घरातील सर्वजण सिनेमा पहायला गेले असल्याची संधी साधून बनावट चावीने सदनिका उघडून सास-यांच्या घरात चोरी केल्याचे कबुल केले आहे. त्याच्याकडून पोलिसांनी ७० ग्रॅम वजनाचे ३ लाख ५० हजार रुपयांचे दागिने जप्त केले आहेत.
