Crime : जुन्नर तालुक्यात घडलेल्या एका धक्कादायक घटनेने संपूर्ण परिसरात मोठी खळबळ उडाली आहे. एकतर्फी प्रेमातून तरुणीवर कोयत्याने जीवघेणा हल्ला केल्यानंतर संबंधित तरुणाने जंगलात पळ काढला आणि दुसऱ्याच दिवशी टेकडीवर झाडाला गळफास घेतलेल्या अवस्थेत त्याचा मृतदेह आढळून आला. या घटनेमुळे गावकऱ्यांमध्ये भीती आणि संतापाचं वातावरण निर्माण झालं आहे.
मिळालेल्या माहितीनुसार, महेश डामसे (वय अंदाजे 24) असं मृत तरुणाचं नाव आहे. तो जुन्नर परिसरातील रहिवासी होता. गावातील एका कॉलेजमध्ये शिकणाऱ्या तरुणीवर त्याचं काही महिन्यांपासून एकतर्फी प्रेम होतं. काही दिवसांपूर्वी त्याने त्या तरुणीकडे लग्नाचा प्रस्ताव ठेवला होता. मात्र तरुणीने स्पष्ट नकार दिल्यानंतर तो मानसिकदृष्ट्या अस्वस्थ आणि संतप्त झाल्याचं स्थानिकांकडून सांगितलं जात आहे.
बुधवारी सकाळी सुमारे 8 वाजण्याच्या सुमारास ही घटना घडली. संबंधित तरुणी जुन्नरमधील आदिवासी मुलींच्या शासकीय वस्तीगृहातून कॉलेजला जाण्यासाठी बाहेर पडली होती. त्याच वेळी वस्तीगृहाजवळ थांबून बसलेला महेश अचानक तिच्यासमोर आला. काहीही वाद किंवा चर्चा न होता त्याने हातातील कोयत्याने तिच्या डोक्यावर आणि चेहऱ्यावर सलग वार केले. अचानक झालेल्या या हल्ल्यामुळे तरुणी गंभीर जखमी होऊन रक्ताच्या थारोळ्यात कोसळली. परिसरातील नागरिकांनी तिला तातडीने जवळच्या रुग्णालयात दाखल केलं असून तिच्यावर उपचार सुरू आहेत.
हल्ल्यानंतर महेश घटनास्थळावरून पळून गेला. पोलिसांनी त्याचा शोध घेण्यासाठी जंगल परिसरात रात्री उशिरापर्यंत मोहीम राबवली. दुसऱ्या दिवशी सकाळी जवळच्या टेकडीवर त्याची दुचाकी आढळून आली. त्यानंतर परिसरात शोध घेत असताना काही अंतरावर एका झाडाला गळफास घेतलेल्या अवस्थेत त्याचा मृतदेह सापडला.
या संपूर्ण घटनेमुळे एकतर्फी प्रेमातून वाढणाऱ्या हिंसाचाराचा प्रश्न पुन्हा ऐरणीवर आला आहे. तज्ज्ञांच्या मते, तरुणांमध्ये नकार स्वीकारण्याची मानसिक तयारी नसणे, भावनिक असंतुलन आणि संवादाचा अभाव ही अशा घटनांमागची महत्त्वाची कारणं मानली जातात. समाजात जागरूकता, समुपदेशन आणि कुटुंबीयांचा संवाद वाढवणे आवश्यक असल्याचंही मत व्यक्त केलं जात आहे.
