Crime : रत्नागिरी तालुक्यातील ताणदे गावात आंबा व्यावसायिक रुपेश नागवेकर यांनी सोमवारी राहत्या घरी स्वतःवर बंदुकीतून गोळी झाडून घेत आत्महत्या केल्याची घटना घडली. गोळीबाराचा आवाज ऐकून घरातील सदस्यांनी धाव घेतली असता ते जखमी अवस्थेत आढळले. रुग्णालयात दाखल केल्यानंतर डॉक्टरांनी त्यांना मृत घोषित केले.
प्राथमिक माहितीनुसार, नागवेकर यांनी स्वतःच्या घरातच गोळीबार केला. घटनास्थळी रक्ताच्या थारोळ्यात ते पडलेले आढळले. त्यांना तातडीने रुग्णालयात हलविण्यात आले, मात्र उपचारापूर्वीच त्यांचा मृत्यू झाला.
तपासादरम्यान, ते काही काळापासून आजारपणामुळे त्रस्त होते, अशी माहिती समोर आली आहे. तसेच व्यवसायातील आर्थिक अडचणी आणि देणी यांमुळे ते मानसिक तणावाखाली असल्याचेही सांगितले जात आहे. आत्महत्येचे नेमके कारण स्पष्ट झालेले नाही.
घटनेची माहिती मिळताच पोलिसांनी घटनास्थळी भेट देऊन पंचनामा केला. वापरण्यात आलेली बंदूक परवानाधारक होती का, तसेच कोणतीही सुसाईड नोट आढळली का, याबाबत तपास सुरू आहे.
