यवत, ता.1 : यवत (ता.दौंड) परिसरात झालेल्या चोरीच्या गुन्हा उघडकीस आणण्यास स्थानिक गुन्हे अन्वेषण शाखेला यश आले आहे.पोलिसांनी अवघ्या 48 तासाच्या आत गुन्हा उघडकीस आणून आरोपीला बेड्या ठोकल्या आहेत. पोलिसांच्या या कामगिरीचे सर्वत्र कौतुक होत आहे.
सुनील बजरंग काळे (वय 22 , रा. समता नगर राहू, ता.दौंड, जि.पुणे) असे अटक करण्यात आलेल्या आरोपीचे नाव आहे. पोलिसांनी दिलेल्या माहितीनुसार, स्थानिक गुन्हे शाखेचे पथक यवत पोलिस ठाण्याच्या हद्दीत गुरुवारी (ता.30) गस्त घालत होते. गस्त घालत असताना पोलिसांना यवत पोलिस ठाण्यातील भारतीय न्याय संहिता कलम 305 हा गुन्हा आरोपी सुनील बजरंग काळे याने केला असल्याची माहिती पोलिसांनी एका खबऱ्या मार्फत मिळाली.
मिळालेल्या माहितीच्या अनुषंगाने पोलिसांनी समांतर दिशेने तपास केला असता, आरोपी सुनील काळे हा राहू गावातून यवत कडे जाणाऱ्या रस्त्यावर मिळून आला. आरोपीला ताब्यात घेऊन अधिक चौकशी केली असता, आरोपीने सदर गुन्ह्याची कबुली पोलिसांना दिली आहे.
दरम्यान, आरोपीने गुन्ह्यात चोरलेली गेलेली एकूण रक्कम 2 लाख 50 हजार रुपयांपैकी 1 लाख 30 हजार रुपये त्याने त्याच्या अकाउंट वरुन त्याचा भाऊ गणेश बजरंग काळे याच्या इको बँकेच्या अकाउंटवर पाठवल्याचे सांगत आहे. तसेच 60 हजार रुपये व अर्धा तोळा वजनाचे कानातील झुबे,साड्या व इतर साहित्य घरी ठेवल्याचे सांगत आहे. उर्वरित रक्कम ऑनलाइन गेम मध्ये उडवल्याचे सांगितले आहे. आरोपीला अटक करून पुढील कारवाई साठी यवत पोलीस ठाण्याच्या ताब्यात दिले आहे.
सदरची कामगिरी पोलीस अधिक्षक संदीप सिंह गिल, अप्पर पोलीस अधीक्षक गणेश बिरादार , पोलीस उपअधीक्षक बापूराव दडस, स्थानिक गुन्हे शाखेचे पोलीस निरीक्षक प्रमोद क्षीरसागर यांच्या मार्गदर्शनाखाली सहाय्यक पोलिस निरीक्षक राहुल गावडे, सहाय्यक फौजदार सचिन घाडगे, आसिफ शेख, पोलिस हवालदार, अजित भुजबळ, योगेश नागरगोजे व त्यांच्या सहकाऱ्यांनी केली आहे.
