Crime News : आष्टी तालुक्यातील सांगवी (पाटण) येथे एका २० वर्षांच्या तरुणाचा दुर्दैवी मृत्यू झाल्याची घटना समोर आली आहे. कुटुंबाचा मुख्य आधार असलेल्या या तरुणाच्या जाण्याने परिसरात हळहळ व्यक्त केली जात आहे. भाऊसाहेब ऊर्फ बावड्या राम खंडागळे असे त्याचे नाव आहे. (Crime News)
भाऊसाहेब गेल्या काही वर्षांपासून गावातील एका हॉटेलमध्ये काम करून कुटुंबाला मदत करत होता. शुक्रवारी तो शेतात कामासाठी गेला होता, पण रात्रीपर्यंत घरी परतला नाही. त्यामुळे नातेवाईकांनी त्याचा शोध सुरू केला. रात्री उशिरा गावाजवळील नदीकाठी त्याचा मृतदेह आढळून आला.
भाऊसाहेबच्या घरची परिस्थिती अत्यंत हलाखीची होती. वडील मजुरीच्या कामासाठी बाहेरगावी जात, आई कामानिमित्त पुणे आणि गावात ये-जा करत होती. अशा परिस्थितीत भाऊसाहेब स्वतः कष्ट करून घर चालवत होता. त्याच्या जाण्याने कुटुंबावर मोठे संकट कोसळले आहे.
भाऊसाहेबने हे पाऊल का उचलले, याचे कारण अद्याप स्पष्ट झालेले नाही. मृत्यूपूर्वी त्याने कोणाशी संपर्क साधला होता का, याबाबत पोलिसांकडून तपास सुरू आहे. यासाठी त्याचा मोबाईल महत्त्वाचा ठरू शकतो, अशी चर्चा आहे.
घटनेची माहिती मिळताच आष्टी पोलीस घटनास्थळी दाखल झाले. मृतदेह शवविच्छेदनासाठी पाठवण्यात आला असून या प्रकरणी आकस्मिक मृत्यूची नोंद करण्यात आली आहे. पुढील तपास पोलीस करत आहेत.
